Bruce Melodie ukomeje kwerekana ko ntaho ahuriye na Meddy na The Ben agiye kwamamaza Kigali Arena kuri miliyoni 150 Frws

Itahiwacu Bruce Melodie yasinye amasezerano yo kwamamaza Kigali Arena afita agaciro ka miliyoni 150 Frw.

Ni amasezerano yashyizweho umukono na Ndayisaba Lee ureberera inyungu za Bruce Melodie ndetse na nyiri ukwamamaza Bruce Melodie yayateyeho isinya. Kuri instagram ya Bruce Melodie yanditse’’Inzu nini ihambaye muri Afurika’’.

Yakomeje ahita ararika abafana be ko uyu mugoroba aza kubataramira hamwe n’itsinda rimucurangira. Ikirori kiraca imbonankubone kuri YouTube ye. Ati:’’Mukanya turarya show kuri YouTube chanel yange, saa moya zuzuye, njye na Band’’.

Uwavuga ko Bruce Melodie ari we wihariye isoko rya muzika nyarwanda ntiyaba ari kure y’ukuri dore ko indirimbo zigezweho aba afitemo ize, iz’abahanzi afasha, cyangwa se izo yiyambajwemo (collabo). Kuva Covid-19 Melodie yihariye amasezerano yamamariza ibigo bikomeye bya hano mu Rwanda ari nako abijyanisha no gukora indirimbo zikurura amagambo mu bantu batandukanye nyamara we yabaga ari gutegura neza ibihe bizaza kuko ubu ari mu bahanzi bahenze mu gukorana nabo mu iyamamaza bucuruzi.

Kigali Arena agiye kuyamamaza nayo ikazamukorera ibyo akeneye byose ifite birimo kuhakorera ibitaramo, inama n’itangazamakuru, kuhafatira amashusho y’indirimbo n’ibindi byose azakenera. Ni amasezerano yashyizweho umukono ku mpande zombi kuri uyu wa kabiri tariki 04 Gicurasi 2021. Kigali Arena ni imwe mu nzu ziberamo imikino y’amaboko, ibitaramo n’inama nini muri Afurika y’I Burasirazuba. Yuzuye itahwa ku ya 09 Kanama 2019. Isanzwe icungwa na Minisiteri ya siporo ikaba ifite ubushobozi bwo kwakira abantu ibihumbi 10. Tubibutseko ku itariki 29 Nyakanga mu 2020 Bruce Melodie yasinye amasezerano y’umwaka umwe ya miliyoni 50 yo kwamamaza ikinyobwa cya Brok cyo muri Poland. Mbere y’umwaduko wa Coronavirus Kigali Arena niyo yabereyemo Kwita Izina Concert yarimo Ne-Yo nk’umuhanzi mukuru, Bruce Melodie, Riderman, ndetse na Charly na Nina.