Donald Trump yatangije urubuga rwa Internet

bg
Donald Trump yatangije urubuga rwa Internet

Uwahoze ari Perezida wa Leta zunze Ubumwe z’Amerika Donald Trump yatangije ku mugaragaro urubuga rwe rwa Internet nyuma yo guhagarikwa ku mbuga nkoranyambaga zitandukanye.

Donald Trump yahagaritswe gukoresha imbuga nkoranyambaga zitandukanye zirimo Twitter, Facebook, Instagram n’izindi bitewe ahanini n’uko yagaragaje ko ashyigikiye abigaragambyaga ku ngoro y’Inteko ishinga amategeko ya Amerika “Capitol” hagapfa n’abantu batanu.

Ubwo Abadepite bari bategereje kwemeza uwahigitse undi hagati ya Biden na Trump, abayoboke ba Trump bigabye muri Capitol bahateza imyivumbagatanyo bamwe barakomereka abandi barapfa.

Icyatangaje n’uko Trump yahise yitabaza Twitter agaragaza ko yishimiye ibi bikorwa kandi ko abashyigikiye, ibi byatumye Twitter ifata umwanzuro wo ku mufungira konti ye.

Hadaciye kabiri n’izindi mbuga nkoranyambaga zahise zifatira ku gakanu Donald Trump maze akurwa ku mbuga nkoranyambaga.

Nyuma y’amezi agera kuri atatu atagaragara ku mbuga nkoranyambaga, yahisemo gushinga urubuga rwe yise 45.office.com azajya yifashisha n’umugore we Melania Trump bashyiraho amakuru yabo.

Kugeza ubu kuri uru rubuga hagaragaraho amateka y’ubuzima bwa Donald Trump n’uko yazanye impinduramatwara muri Politiki ya Amerika, uko yabaye Perezida wa mbere utowe atari asanzwe mu bya Politiki n’ibindi.

Ibindi biriho ni amafoto arenga icumi yifotoje mu bihe bitandukanye, hari aho agaragara yurira indege y’ingabo zirwanira mu kirere, ifoto imugaragaza asuhuzanya na Kim Jong Un wa Korea ya Ruguru n’aho agaragara ari gusoma umwana muto.

Si ayo gusa ahubwo kuko hariho n’amafoto ya Melanie Trump n’umugabo we babyinira intsinzi ubwo Trump yatorerwaga kuyobora Amerika.

Mu bindi bigaragara ni uko Donald Trump yabaye intwari mu guhagarika ikwirakwira rya Covid-19 ubwo yagaragaraga bwa mbere mu Bushinwa binyuze mu guhagarika ingendo zerekezayo. Ibintu bavuga ko byarokoye ubuzima bwa benshi.

Umujyanama wa Trump, Jason Miller yatangaje ko Donald Trump azongera kugaragara ku mbuga nkoranyambaga mu mezi abiri cyangwa atatu yifashishije urubura rwe bwite. Yavuze ko kandi urwo rukuta ruzakurura abantu byibuze miliyoni 10 barukoresha.