Ashobora kwitwika: Moses Turahirwa ngo yarimo gutwika
Urubanza rw'uwashinze inzu y'imideli ya Moshions uzwi nka Moses Turahirwa rwatangiye uyu munsi. Baburana ku ifungwa n'ifungurwa rye. Yireguye avuga ko yagaragaje ko yahinduwe umugore mu rwego rw'ibikoreshwa iki gihe bizwi nko gutwika.
Kuri uyu wa 10 Gicurasi 2023 nibwo hatangijwe urubanza rwa Turahirwa Moïse wamamaye nka Turahirwa Moses washinze inzu y'imideli, Moshions yagejejwe imbere y'ubucamanza agiye kuburana ku ifungwa n'ifungurwa. Akaba ashinjwa ibyaha byo gukoresha inyandiko mpimbano n'ikoreshwa ry'ibiyobyabwenge. Yireguye avuga ko yasangije abakoresha Instagram inyandiko igaragaza ko yahinduwe igitsina akaba umugore (F) mu rwego rw'ibikoreshwa n'urubyiruko rw'iki gihe bizwi nko "gutwika."
Turahirwa ukurikiranweho ibyaha bibiri birimo gukoresha inyandiko mpimbano n'ikoreshwa ry'ibiyobyabwenge. Uyu Moses afite umwavoka witwa Me Bayisabe Irene. Yemereye mu rukiko ko yakoresheje ibiyobyabwenge mu gihe yari mu gihugu cy'Ubutaliyani aho yari yaragiye kwiga. Ngo kandi hari ibyo bamusanganye (urumogi) mu ishati ye igihe bari baje kumufata atazi uburyo rwagezemo, atari bwanayambare.
Yireguye kandi ko atigeze ahindura inyandiko z'inzira (Passport) ahubwo ko yakoze ibigezweho bifatwa nko "gutwika" ku mbuga nkoranyambaga. Yavuze ko yabikoze atagamije ikintu kibi.
Ubushinjacyaha bwatangaje ko uyu Moses yasanzwemo ingano y'ibiyobyabwenge bw'urumogi ingana na 321 THC.
Abo mu muryango we bemereye urukiko kuba abamwishingiye ko naramuka arekuwe by'agateganyo atazigera atoroka igihugu.
Amakuru y'itabwa muri yombi rya Turahirwa Moses ryamenyekanye ku wa 28 Mata 2023 akurikiranyweho gukoresha ibiyobyabwenge n' inyandiko mpimbano.
