Cristiano Ronaldo yakoze akandi gahigo nyuma yo gufasha Juventus kwegukana Coppa Italia 2021
Rutahizamu w’Umunya Portugal na Juventus,Cristiano Ronaldo,yaraye yegukanye igikombe cya 34 mu mateka ye ubwo Juventus yatsindaga Atalanta ibitego 2-1 yegukana igikombe cya Coppa Italia 2021 ari nacyo gikombe cyonyine itwaye muri uyu mwaka w’imikino.
Juventus yaraye yegukanye igikombe cya 14 cya Coppa Italia ibifashijwemo n’ibitego 2 yatsindiwe na Dejan Kulusevski na Federico Chiesa.
Gutwara igikombe cya Coppa Italia 2021 kuri Cristiano Ronaldo,byatumye aba umukinnyi wa mbere utwaye ibikombe 3 by’igihugu muri shampiyona 5 zikomeye ku mugabane w’I Burayi.
Dejan Kulusevski yatsinze igitego cya mbere ku munota wa 31 hanyuma kiza kwishyurwa na Ruslan Malinovskiy ku munota wa 41.Igice cya mbere kirangira ari 1-1.
Igice cya kabiri cyatangiye Juventus yariye amavubi aho abakinnyi bayo nka Cristiano Ronaldo, Juan Cuadrado, Federico Chiesa na Kulusevski baje bakina umupira utandukanye n’uwo mu gice cya mbere.
Inzozi za Atalanta zo kwegukana iki gikombe zashize ubwo ku munota wa 72 Federico Chiesa yatsindaga igitego cya kabiri.
Andrea Pirlo atwaye igikombe cya 2 muri Juventus ariko ntabwo arabasha kwitwara neza yaba muri shampiyona cyangwa Champions League.
Yaba Cristiano Ronaldo na Andrea Pirlo biravugwa ko bashobora kuva muri iyi kipe nyuma y’uyu mwaka w’imikino aho bivugwa ko uyu rutahizamu wa mbere muri Serie A adashaka gukina Europa League mu gihe Pirlo we ashobora kwirukanwa kubera umusaruro mubi.
