Ab Godwin yakatiwe azira kugurutsa drone nta burenganzira abifitiye

Umwe mu bahanga mu gutunganya amashusho y'indirimbo hano mu Rwanda, Ab Godwin yamaze gukatirwa gufungwa imyaka 2 n'ihazabu ingana na miliyoni 5 Rwf, azira kugurutsa indege itagira umupilote izwi nka drone.

May 26, 2023 - 18:51
May 26, 2023 - 19:11
 0
Ab Godwin yakatiwe azira kugurutsa drone nta burenganzira abifitiye
Ab Godwin agiye gufungwa umwaka umwe undi usubikwe, atange kandi n'ihazabu ya miliyoni 5 Rwf, (photo; Internet)

Kuri uyu wa Gatanu, 26 Gicurasi 2023 urukiko rw'ibanze rwa Nyarugenge rwanzuye ko Mutimura Abed uzwi nka Ab Godwin mu gutunganya amashusho y'indirimbo afungwa imyaka ibiri (2) n' ihazabu ya miliyoni 5 Rwf azira kugurutsa indege itagira umupilote, drone, nta burenganzira abifitiye. We akaba yarireguye ko nta makuru yuzuye yarabifiteho niba ibyo ari icyaha.

Ku wa 18 Gicurasi uyu mwaka nibwo urubanza rw'uyu muhanga mu gutunganya amashusho rwabaye, ubushinjacyaha bwamusabiye gufungwa imyaka itatu kugira ngo bibere abandi urugero batunze indege zitagira abapilote. Kuzigurutsa bajye babanza bake uruhushya.

Urubanza rwasomwe kuri uyu wa Gatanu rwahamije Ab Godwin icyo cyaha (kugurutsa indege itagira umupilote nta burenganzira) bahita banzura ko agiye gufungwa umwaka 1 undi ugasubikwa n'ihazabu ya miliyoni 5 Rwf. 

Ntawashidikanya ko ifungwa rye rigiye kugaragaza icyuho mu itunganywa ry'amashusho y'indirimbo mu Rwanda, kuko yari umwe mu bahanga muri ako kazi.

Niyonkuru Augustin He is a journalist. For more information, please contact him; +250781548774.