Arsenal: Arteta hari icyo yavuze kuri Gabriel Jesus, ibitego byabanye ubutayu

Mu kiganiro n'itangazamakuru nyuma y'umukino wahuje Arsenal na Wolves kuri uyu wa Gatandatu, 12 Ugushyingo 2022, umutoza wa Arsenal, Mikel Arteta yamaganiye kure abanenga umukinnyi we, Gabriel Jesus ko atajya yitsindira ibitego, bikabaviramo kuvuga ko Gabriel yabaye mubi. Arteta yabwiye abanyamakuru ko Gabriel atari umukinnyi mubi ndetse ngo afite uruhare runini kuba bakiyoboye Shampiyona y'Abongereza ( English Primier League).

Mikel Arteta yavuze ko Gabriel Jesus ari umwe mu bakinnyi Arsenal igenderaho. Atanga umusanzu ufatika muri buri mukino bakinnye, afasha bagenzi be kubona ibitego. Yakomeje avuga ko nta bugugu agira.

Yagize ati;" Gabriel Jesus ni umukinnyi mwiza. Akunda ikipe akinamo, yubaha ubuyobozi na bagenzi be. Aho turi none, yabigizemo uruhare rutaziguye."

Yongeyeho ko amushimira uburyo ari kwitwara hamwe n'ikipe yose muri rusange. 

Ibyo Arteta yabivuze mu gihe abarimo Paul Merson wakiniye Arsenal mu minsi yashize, yamushwagije ko atakiri umukinnyi mwiza nkuko yarameze akiri mu ikipe ya Manchester City, aho yakundaga kubona ibitego.

Uyu mukinnyi, Gabriel Jesus yaje muri Arsenal mu mpeshyi y'uyu mwaka, avuye muri Manchester City aho yaramaze gutwara igikombe cya Shampiyona y'Abongereza. Akaba yarahamagawe mu ikipe y'igihugu cye cya Brazil, we n'ikipe ye baritegura kwerekeza muri Qatar mu mikino ya nyuma y'igikombe cy'Isi.

Arsenal ikomeje kuyobora urutonde rwa Shampiyona y'Abongereza n'amanota 37. Yayagize nyuma yaho kuri uyu wa Gatandatu, yanyagiye Wolves ibitego 2 kuri 0. Ikurikirwa na Manchester City ifite amanota 32, yagumanye ayo, imaze  gutsindwa na Brentford 2 kuri 1.