AFCON 2022: Menya amakipe yitabiriye igikombe cy' Afrika ndetse na sitade zizakinirwaho

AFCON 2022:  Menya amakipe yitabiriye igikombe cy' Afrika ndetse na sitade zizakinirwaho

Amakipe agera kuri 24 yitabiriye imikino ya nyuma y' igikombe cy' Afrika cyigiye gukinirwa muri Cameroon. Hari amatsinda atandatu(6), buri tsinda rifite aho rizakinira.

Kuri icyi Cyumweru, tariki ya 09 Mutarama 2022, haratangira imikino ya nyuma y' igikombe cy'Afrika. Icyi gikombe kigiye gukinwa ku nshuro ya 33 kizakinirwa mu mijyi itandukanye ya Cameroon harimo Yaounde, Limbe, Bafoussam,  Garoua na Douala.

Iyi mikino ya nyuma igiye gukinwa muri uyu mwaka si ho yari iteganyijwe. Mu mpeshyi ishize niho imikino ya nyuma y'igikombe cy'Afrika yari gukinwa. Ariko kubera ubwiyongere bukabije bw' icyorezo cya Covid19, byatumye gisubikwa. 

Amakuru dukesha igitangazamakuru Evening Standard avuga ko hari sitade zatunganyijwe ziteguye kwakira iyo mikino. Ayo masitade ni "Sitade ya Limbe " iherereye mu mujyi wa Limbe, "Sitade ya Olembe" iherereye mu murwa mukuru wa Cameroon, Yaounde, "Sitade ya Ahmadou Ahudo" na yo iherereye mu murwa mukuru. 

"Sitade ya Japoma" iherereye mu mujyi wa Douala, "Sitade ya Roumde Adija iherereye mu mujyi wa Garoua na "Sitade ya Koueking" iherereye mu mujyi wa Bafoussam.

Ni igikombe kigiye gukinwa n' amakipe agera kuri 24 ari mu matsinda 6 aherereye ku masitade 6 mu mijyi itandukanye muri Cameroon.

Ayo matsinda ni:

Itsinda rya mbere(A): Cameroon ( yakiriye irushanwa), Cape Verde, Ethiopia na Burkina Faso.

Itsinda rya kabiri(B): Senegal, Zimbabwe, Makawi na Guinea.

Itsinda rya gatatu (C):  Ghana, Comoros (ikirwa), Gabon na Morocco.

Itsinda rya kane(D): Guinea Bissau, Egypt (Misiri), Sudan na Nigeria.

Itsinda rya gatanu(E): Algeria, Sierra Leone, Cote D'Ivoire na Guinea Equatorial.

Itsinda rya gatandatu (F): Gambia, Mali, Tunisia na Mauritania.

Umukino wa mbere w' irushanwa uzaba kuri icyi Cyumweru,09 Mutarama 2022,uzahuza ikipe y'igihugu ya Cameroon yakiriye irushanwa n' ikipe ya Burkina Faso mu masaha ya nimugoroba.

Imikino ya nyuma y'igikombe cy'Afrika iheruka gukinwa mu mwaka wa 2019, aho iki gikombe cyatwawe n' ikipe ya Algeria ku mukino wa nyuma itsinze ikipe y' igihugu ya Senegal.