AFCON2021: Byasabye iminota irenga 120 na penaliti kugira ngo Senegal itware igikombe

Senegal ni yo yatwaye igikombe cy'Afrika ku buryo bugoranye.

Feb 7, 2022 - 09:59
Feb 7, 2022 - 10:50
 0
AFCON2021: Byasabye iminota irenga 120 na penaliti kugira ngo Senegal itware igikombe

Kuri icyi Cyumweru, 06 Gashyantare 2022 nibwo hakinwe umukino wa nyuma w' igikombe cy'Afrika, wahuje ikipe y' Igihugu ya Senegal na Misiri. Wari umukino ukomeye cyane ku mpande zombi. Wabagejeje mu gace ka penaliti, Senegal igiriramo amahirwe.

Ni umukino watangiye saa tatu z'umugoroba. Iminota isanzwe y' umukino (90'), yarangiye ari ubusa ku busa(0-0). Hongeweho iminota 30' na yo irangira ari 0-0. Hitabajwe penaliti maze Senegal irigaragaza.

Abazamu b' amakipe yombi bari bakaniye, uwa Senegal, Mendy na Misiri, Gabaski. Senegal yabashije kwinjiza 4, Misiri yatsinze ebyiri. 

Senegal yahise iterura igikombe cy'Afrika cya mbere , AFCON 2021. 

Senegal itwaye iki gikombe cy'Afrika nyuma yaho igeze ku mukino wa nyuma inshuro ebyiri zikurikiranya. Mu mikino ya nyuma ya AFCON 2019, Senegal yari yageze ku mukino wa nyuma, iza gutsindwa na Algeria, ibura igikombe. 

Abakinnyi ba Senegal bari biyemeje ko bagomba gutwara igikombe cy'uyu mwaka. N'umutoza wa Senegal, Cissé yari yijeje abanyagihugu ba Senegal ko bagomba gutwara igikombe cy'Afrika. Byarangiye basoje ibyo babijeje.

Abakinnyi ba Senegal bari mu bakinnyi bitwaye neza muri iri rushanwa. Umuzamu wa Senegal, Eduard Mendy yahembwe nk' umuzamu w' irushanwa. Sadio Mane yatowe nk'umukinnyi mwiza w' irushanwa. Umukinnyi w' ikipe y'igihugu ya Cameroon, Vincent Aboubacar yatowe nk'umukinnyi watsinze ibitego byinshi mu irushanwa.

Niyonkuru Augustin He is a journalist. For more information, please contact him; +250781548774.