Ese Rihanna ni we ukurikirwa cyane kuri Twitter?
Urubuga nkoranyambaga rwa Twitter rukoreshwa n'ibyamamare bitandukanye hirya no hino ku Isi. Thefacts.rw yabakoreye urutonde rw'abakurikirwa cyane ku rubuga rwa Twitter.
Urubuga rwa Twitter rwegukanywe n'umuherwe Elon Musk mu mpera z'umwaka wa 2022. Akirufata yashyizeho amategeko n'amabwiriza avuguruye bituma bamwe batangira kurwinubira, ibyo ntibyabujije umubare w'abakurikira ibyamamare kwiyongera. Thefacts.rw yakoze urutonde rw'ibyamamare icumi (10) bikurikirwa cyane kuri urwo rubuga.
Ukurikirwa cyane kuri urwo rubuga ni Elon Musk ukurikirwa n'abarenga miliyoni 138.9. Uwa kabiri n'uwahoze ari Perezida wa Leta Zunze Ubumwe z'Amerika, Barack Obama ukurikirwa n'abarenga miliyoni 132.7, umuhanzi ufite inkomoko muri Canada, Justin Bieber akurikirwa n'abarenga miliyoni 112.8.
Rurangiranwa mu mupira w'amaguru Cristiano Ronaldo w'Umunya-Portugal aza ku mwanya wa kane aho afite abamukurikira bagera kuri miliyoni 108.5, umuhanzikazi Rihanna aza ku mwanya wa gatanu aho afite abamukurikira barenga miliyoni 108.3.
Umuhanzikazi w'Umunyamerikakazi Katty Perry aza ku mwanya wa gatandatu aho afite abamukurikira bagera kuri miliyoni 108, Taylor Swift we aza ku mwanya wa karindwi akaba afite abarenga miliyoni 92.7.
Minisitiri w' intebe w'Ubuhunde, Narendra Modi aza ku mwanya wa munani na miliyoni 88.5, ku mwanya wa cyenda haza uwahoze ari Perezida wa Leta Zunze Ubumwe z'Amerika, Donald Trump aho afite miliyoni 87, uru rutonde rw'ibyamamare 10 rufungwa n'umuhanzikazi Lady Gaga aho afite miliyoni 84.5 zimukurikira ku rubuga rwa Twitter.
