Ibyo Ramsdale yavuze ku Bwongereza, byasohoye

Ibyo Ramsdale yavuze ku Bwongereza, byasohoye

Ibyo umukinnyi wa Arsenal yavuze ku ikipe y'Abongereza byabaye impamo.


Ku mugoroba wo kuri uyu wa Mbere, 21 Ugushyingo 2022, imikino ya nyuma y'igikombe cy'Isi 2022, yakomeje aho ikipe y' Ubwongereza "Three Lions" yatangiye umunsi wa kabiri w'iyi mikino yesurana n'ikipe y'igihugu ya Iran. Byarangiye Abongereza bigaragaje banyagiye Iran ibitego 6 kuri 2. Umukinnyi wa Arsenal, Bukayo Saka akaba yatsinzemo ibitego 2, byahise bishimangira ibyo mugenzi we bakinana muri Arsenal ndetse no mu ikipe y' igihugu, Aaron Ramsdale, yavuze  ko Bukayo azigaragaza mu gikombe cy'Isi.


Mu kiganiro n'itangazamakuru ku wa 18 Ugushyingo 2022, umunyezamu wa Arsenal yababwiye ko kubera umuhate n'ishyaka abonana umukinnyi wa Arsenal, Bukayo, bizatuma yigaragaza mu gikombe cy'Isi cya 2022. 


Ku mukino wahuje Ubwongereza na Iran, Bukayo yabanje mu kibuga, nyuma yaje gusimburwa na Phil Foden. Iminota yakinnye yayikoresheje neza abona ibitego 2 muri 6 batsinze. Ibyo byashimishije Ramsdale wari ku ntebe y'abasimbura; mu izamu habanjemo Jordan Pickford. Byagaragaje kandi ko atabeshye.


Ibitego 6 kuri 2 byatumye ikipe y'Abongereza "Three Lions"  ica agahigo ko kuba ari yo kipe ya mbere itsinze ibitego byinshi mu mikino ya nyuma y'igikombe cy'Isi 2022, kiri kubera muri Qatar, kuko mu wabanje wagaragayemo ibitego 2.Iyo kipe kandi izagaruka mu kibuga ku wa Gatanu, 25 Ugushyingo 2022, aho izahura na USA. Kuri icyi Cyumweru, 20 Ugushyingo 2022, nibwo igikombe cy'Isi 2022 cyatangijwe ku mugaragaro. Cyatangiye ikipe ya Ecuador inyagira ikipe ya Qatar 2-0.