Umuganga w'ikipe y'Iburayi yahamagawe kujya kuvura Papa Francis

Umuganga w'ikipe y'Iburayi yahamagawe kujya kuvura Papa Francis

Umuganga w'inzobere mu byo kubaga, akaba avura mu ikipe ya Atlentico Madrid, Villalón yahishuye ko aherutse kujya gusuzuma Papa Francis imvune yo mu ivi.


Kuri uyu wa 24 Ugushyingo 2022, ukuriye abandi baganga b'ikipe y'amaguru ya Atlentico Madrid yo muri Espanye (Spain), José Maria Villalón yahamirije radiyo yo muri Espanye, COPE Radio, ko mu minsi ishize yahamagajwe ngo ajye gusuzuma ndetse anavure imvune yo mu ivi y' Umushumba wa Kiliziya Gatolika ku Isi, Papa Francis amaranye iminsi.


Mu kiganiro Villalón yagiranye na COPE, yahishuye ko aherutse guhamagazwa nk'umuganga w'inzobere mu byo kubaga ndetse yahasanze n'izindi nzobere muri byo. Ngo bakigera i Vatican basanze koko Papa afite imvune mu ivi ituma agendera mu igare ry'abafite ubumuga. Bakoreye isuzuma iryo vi ngo barebe uko barivura.


Villalón yahishuye ko yari afite igishyika mbere yo guhura na Papa. Yagize ati;" Nkuko tubizi Papa ni umuntu udasanzwe. Mu kumuvura ugomba kwigengesera. Numvaga mfite ubwoba mbere yuko duhura."


"Papa Francis akomoka mu gihugu cya Argentine, burya na we afana umupira w'amaguru, hari n'abakinnyi  b'Abanya-Argentine bo muri Atlentico Madrid akunda. Afana Argentine. Ibyo byanteye ishema njya kumuvura."


Yongeyeho ko icyo bakoze ari ugusuzuma iryo vi, ngo bazasubirayo kumuvura mu minsi iri imbere.


Papa Francis aherutse guhamiriza Ibiro Ntaramakuru by'Abongereza, Reuters ko afite imvune yo ivi ituma agendera mu igare ry'abafite ubumuga. Ngo ikaba yaranatumye asubika ingendo yarafite muri Afrika zirimo n'urwo yari kugirira muri Repubulika Iharanira Demokrasi ya Congo (RDC).


Uyu Mushumba wa Kiliziya Gatolika ku Isi, Papa Francis afite imyaka 85. Akunda guhura n'indwara z'ubukure zirimo n'iz'ingingo. Ibyo bigatuma asubika bimwe mu bikorwa aba yateguye birimo n'ingendo mpuzamahanga.