Ibyo West Ham yaboneye i Emirates izabibwira abuzukuru

Kuri uyu wa 26 Ukuboza 2022, Shampiyona y'Abongereza, Primier League yagarutse, aho Arsenal yesuranye na West Ham kuri sitade ya Arsenal, Emirates. Ni umukino wagaragaraga ko Arsenal ishobora kuwutakaza. Ubwoba bwinshi bwaganjije abafana ba Arsenal ku munota wa 29' w'umukino, ubwo umukinnyi wa West Ham, Benrahma yashyiragamo igitego cya mbere, igice cya mbere cyarangiye ari kimwe cya West Ham ku busa bwa Arsenal. Ibyo West Ham yabonye mu gice cya kabiri, izabibwira abuzukuru.

Igice cya kabiri, Arsenal yagarutse yariye Amavubi. Ku munota wa 53' Saka yashyizemo igitego cya mbere cya Arsenal, naho ku munota wa 58' Martinelli yashyizemo icya 2. Ntibarekeye aho kuko bakomeje kotsa igitutu ikipe ya West Ham, maze ku munota wa 69' Eddie Nkentiah ashyiramo agashinguracumu, birangira ari ibitego 3-1.

Umutoza wa Arsenal, Mikel Arteta yatangaje ko abakinnyi be bakinnye neza, ngo babikoze no ku munsi udasanzwe wa Boxing Day, Umunsi w' Impano. Yashimiye kandi n'uwahoze ari umutoza wa Arsenal Wenger warebye uyu mukino mu gihe hari hashize imyaka itari mike atikoza kuri Emirates ngo yihere ijisho umukino wa Arsenal imbona nkubone.

Saka, wafunguye amazamu ku ruhande rw'ikipe ya Arsenal, yatangaje ko yishimiye uko umukino wagenze. Yashimiye na Nkentiah witwaye neza ku mukino, dore ko yakinnye asimbuye Gabriel Jesus wavunikiye mu mikino ya nyuma y'igikombe cy'Isi 2022.

Umukinnyi w'umukino yabaye kapiteni w'ikipe ya Arsenal, Odegaard. Akaba yafashije Arsenal kwigaranzura  West Ham, bikaza kurangira banayitsinze 3-1.

Arsenal ikomeje kuyobora urutonde rwa Shampiyona y'Abongereza n'amanota 40.

Wenger na we yari yaje kwihera ijisho uyu mukino, photo; Instagram.