Kizigenza mu kwiruka yinjiye mu gipolisi

Kizigenza mu kwiruka yinjiye mu gipolisi

Umunyabigwi mu kwiruka, akaba yarirutse metero 100 mu masegonda 9.77 yemeje ko yinjiye mu gipolisi.


Kuri uyu wa Kane, 12 Mutarama 2023 inkuru yavuye muri Kenya yemeje ko rurangiranwa mu kwiruka, Ferdinand Omanyala wanditse amateka yo kwiruka metero 100 mu gihe kingana n' amasegonda 9.77, yamaze kwinjira mu gipolisi cya Kenya. Uyu Ferdinand yari mu basoje amasomo ya gipolisi muri Kenya. Umuhango wo kwinjiza mu gipolisi abagera ku 2,881 wabaye ku wa 11 Mutarama 2023, ukaba waruyobowe na Perezida wa Kenya, William Ruto.


Aya makuru yemejwe na nyiri ubwite, Ferdinand Omanyala. Yaciye ku rubuga rwa Twitter yandika ko yamaze kwinjira mu gipolisi, ni ubutumwa yakurikije ifoto imugaragaza yambaye impuzankano y' Igipolisi cya Kenya.


Ferdinand Omanyala w'imyaka 26 winjiye mu mwuga wo gucunga umutekano, yamenyekanye cyane muri Nzeri 2021 ubwo yirukankaga metero 100 mu masegonda 9.77 akaba yarakuyeho agahigo kari gafitwe n'Umunya- Afrika y'Epfo, Akani Simbine wari warirutse izo metero mu masegonda 9.84 gusa.


Muri Kamena 2022, yabaye kizigenza karundura mu kwiruka muri Afrika (African Champion: continental champion over the distance), yarabaye Umunyakenya wa kabiri warugeze kuri urwo rwego. 


Kenya ni kimwe mu bihugu byo muri Afrika bigira abahanga mu kwiruka ahantu harehare mu gihe gito.