Dore abatsinze ibitego bitatu mu mukino umwe (hattricks) inshuro nyinshi

Thefacts.rw yabakoreye urutonde karundura rw'abakinnyi batanu (5)batsinze inshuro nyinshi ibitego bitatu mu mukino umwe (hattricks).

Jan 11, 2023 - 17:27
Jan 11, 2023 - 17:42
 0
Dore abatsinze  ibitego bitatu mu mukino umwe (hattricks) inshuro nyinshi


Umupira w'amaguru  ni umwe mu mikino ikundwa hirya no hino ku Isi dore ko umaze Ikinyejana n'imisago warabaye ubukombe. Abanyarwanda benshi bakunda kureba shampiyona z' i Burayi, bakavuga ko zikinamo ababigize umwuga. Hari abakinnyi bahirwa n'umukino bagatsinda ibitego bitatu cyangwa birenze ibyo mu mukino umwe. Thefacts.rw yagukoreye urutonde rw' abakinnyi batanu (5) batsinze ibitego bitatu mu mukino umwe (hattricks) inshuro nyinshi kurusha abandi bakinnyi bawuconze ndetse bakiwuconga hirya no hino ku Mubumbe.


1. Pelé


Amazina ye bwite ni Edson Anates dos Nascimento akaba yaramenyekanye nka Pelé ni umugabo w' Umunya- Brazil wakoze amateka agoye kuyahirika mu mupira w'amaguru ku Isi; yatsinze ibitego bitari bike ndetse we na Brazil batwara ibikombe by' Isi bitatu. 


Uyu mugabo yatsinze ibitego bitatu mu mukino umwe (hattricks) inshuro 92 mu mikino 1363. Ibyo bimushyira ku mwanya wa mbere mubakoze ayo mateka kugeza ubu muri ruhago y' Isi.


Pelé yitabye Imana ku wa 29 Ukuboza 2022, yarafite imyaka 82.


2. Cristiano Ronaldo


Amazina ye bwite ni Cristiano Aveiro dos Santos Ronaldo akaba ari Umunya- Portugal. Yamenyekanye cyane mu ikipe ya Real Madrid yagezemo avuye muri Manchester United.


Uyu mugabo yatsinze ibitego bitatu mu mukino umwe (hattricks) inshuro 60 mu mikino 1145 . Ibyo bimushyira ku mwanya wa kabiri mu bamaze gutsinda hattricks inshuro nyinshi ku Isi.


3. Lionel Messi


Lionel Andrés Messi ni umwe mu bakinnyi Isi ifite bamaze kubaka igikuta gikomeye cyanditseho ibigwi bitisukirwa, akaba we n'ikipe ya Argentina baherutse gutwara igikombe cy'Isi cya 2022 cyakinirwaga muri Qatar. Icyo cyahise cyiba igikombe cy'Isi cya gatatu Argentina yaritwaye kuva cyatangira gukinwa mu wa 1930.


Messi yatsinze ibitego bitatu mu mukino umwe inshuro 56 mu mikino 1025. Uyu mugabo akomeje kubica bigacika mu ikipe ya Paris Saint Germain yerekejemo avuye muri FC Barcelona.


4. Robert Lewandowski


Uyu Munyapolonye yigaragarije Isi cyane mu gihe yakiniraga ikipe ya Bayern Munich yo mu Budage aho yayifashishije gutwara UCL ya 2020. Ubu akina mu ikipe ya FC Barcelona yo muri Espanye.


Lewandowski yatsinze ibitego bitatu mu mukino umwe (hattricks) inshuro 30 mu mikino 834.


5. Luis Suárez


Luis Alberto Suárez Diaz ni Umunya- Uruguay, akaba yarogeje amaso y' abatari bake cyane cyane abihebeye umupira w'amaguru maze ntibacikwe n' imikino ya nyuma y'igikombe cy'Isi. Uruguay yakinnye imikino ya nyuma y'igikombe cy'Isi cya 2022 cyabereye muri Qatar nubwo itarenze umutaru. Ibyo byashenguye kizigenza wa yo Louis Suarez, yagaragaye ata amarira i Qatar.


Uyu mugabo Luis Suárez yatsinze ibitego bitatu mu mukino umwe (hattricks) inshuro 29 mu mikino 852. Akomeje kuwuconga.

Niyonkuru Augustin He is a journalist. For more information, please contact him; +250781548774.