Malawi yabonye itike ya CAN nyuma y’imyaka 11 Perezida w’igihugu yiruka mu muhanda n’abaturage baririmba intsinzi -VIDEO
Byari ibirori bidasanzwe mu murwa mukuru Lilongwe ndetse no mu bice bitandukanye by’igihugu cya Malawi, nyuma y’uko ikipe y’igihugu y’umupira w’amaguru ikoze amateka igakatisha itike ya CAN nyuma yo gutsinda Uganda, bituma Perezida w’igihugu Chakwera n’abaturage be birara mu mihanda barizihirwa baririmba intsinzi.
Malawi yatsinze Uganda igitego 1 - 0 mu mukino wa nyuma wo mu itsinda B wo gushaka itike y’imikino ya nyuma y'igikombe cya Afurika cy'ibihugu CAN 2022, yongera kwandika amateka yaherukaga mu myaka 11 ishize.
Uyu mukino wabereye mu mujyi wa Blantyre muri Malawi, Uganda yasabwaga kunganya gusa ngo ibone itike, ariko itsindwa igitego cya Richard Mbulu cyabonetse ku munota wa 15 w'umukino, bituma ibura itike yo gukina CAN yaherukagamo mu 2019 mu Misiri.
Umukino ukirangira, wabaye umunsi udasanzwe mu gihugu cya Malawi, aho kwihangana byanze Perezida w’iki gihugu Lazarus Chakwera n’abaturage be biraye mu mihanda yo mu murwa mukuru w’iki gihugu baririmba intsinzi.
Magingo aya Malawi iri mu byishimo bidasanzwe byo kuzitabira CAN izabera muri Cameroun mu 2022. Ni inshuro ya gatatu Malawi itsindiye kwitabira iyi mikino. Malawi yaherukaga mu mikino ya nyuma ya CAN mu 2010 no mu 1984.
Perezida wa Malawi yiruka mu muhanda n'abaturage be bishimira itike ya CAN
Ikipe y'igihugu ya Malawi yakatishije itike ya CAN nyuma y'imyaka 11
