Rema yaciye agahigo muri MENA Chart
Indirimbo "Calm Down" y'umuhanzi ufite inkomoko mu gihugu cya Nigeria, Rema yaciye agahigo ku rubuga rukurikirana iby'umuziki rwa MENA Chart.
Kuri uyu wa 19 Gicurasi 2023, urubuga rukoreshwa n'ibihugu birenga 13 bibarizwa mu Burasirazuba bwo Hagati n'Amajyaruguru y'Afrika rwa MENA Chart (Middle East and North Africa) rwahishuye ko indirimbo y' Umunya-Nigeria, Rema ari yo ndirimbo ya mbere ikunzwe kuri urwo rubuga.
Divine Ikubor uzwi nka Rema w'imyaka 23, indirimbo ye "Calm Down" yayoboye indirimbo 20 zikunzwe mu Burasirazuba bwo Hagati n'Afrika y'Amajyaruguru (MENA Chart). Iyi MENA Chart iherutse gushyirwaho ngo ijye ishyira hanze indirimbo 20 zikunzwe mu bihugu birenze 13 bituwe n'abarenga miliyoni 300 buri cyumweru, urutonde rukazajya rushyirwa hanze buri wa Kane.
Rureba kandi uko indirimbo zakunzwe ku mbuga nkoranyambaga zitandukanye zirimo Youtube, Deezer, Spotify na Apple Music.
Urwashyizwe hanze muri iki cyumweru rwerekanye ko "Calm Down" ariyo iyoboye urwo rutonde.
Uyu Rema yaciye ku mbuga nkoranyambaga ashimira abakunzi b'umuziki we, ashimira kandi na MENA Chart ku bwo kugira indirimbo ye ya mbere.
Rema ubarizwa mu nzu ifasha abahanzi ya Mavin Records yagezemo mu mwaka wa 2019, akaba yaramufashe kandi gushyira hanze alubumu "Rave&Roses" yashyize hanze muri Werurwe 2022. Ibyo byose bikomeje kumuzamurira izina hirya no hino ku Isi.
