UEFA Champions League: Bayern yiyushye akuya ariko biranga
Ku mugoroba wo kuri uyu wa 19 Mata hakinwaga 1/4 y' imikino y' amakipe yabaye aya mbere iwayo ku mugabane w' Iburayi (UCL), umwe mu mikino yabaye ni uwahuje ikipe ya Bayern na Manchester City.
Imikino y' amakipe yabaye aya mbere iwayo ku mugabane w' Iburayi, UEFA Champions League, yari yakomeje hasozwa gukinwa imikino ya 1/4. Aho ikipe ya Manchester City yari yagiye gusura ikipe ya Bayern Munich yo mu Budage. Umukino warangiye zinganyije 1-1, Manchester City ihita ikomeza muri 1/2.
Ni umukino wabaye ukurikira uwabanje mu Cyumweru cyashize wabereye mu Bwongereza kuri Etihad Stadium, kuri sitade ya Manchester City, warangiye ari ibitego 3 bya Man City ku busa bwa Bayern Munich.
Uyu wabaye kuri uyu wa 19 Mata ni wo waciriye umurongo Bayern wo kudakomeza muri 1/2.
Umukino watangiye ikipe yo mu Budage (Bayern) yataka cyane iyo mu Bwongereza (Man City) ariko birangira nta gitego babonye mu minota ya mbere. Ku munota wa 57' nibwo uwitwa Erling Halaand yatsinze igitego, ku mpuzandengo Man City ihita igira ibitego 4-0.
Ikipe ya Bayern yakomeje kotsa igitutu maze ku munota wa 83' Joshua Kimmich atsinda penaliti. Biba bibaye 1-1 impuzandengo iba 4-1. Umukino wanarangiye utyo.
Ku mukino wa mbere hari hagaragaye kutumvikana kwa Sadio Mane na mugenzi we Leroy Sane bakinana muri Bayern ariko kuri uyu mugoroba bagaragaye basuhuzanya igihe Sadio yaragiye kumusimbura (Sane). Bigaragara ko umubano wabo uri kuzahuka.
Ku wa 9 na 10 Gicurasi nibwo iyi mikino izakomeza muri 1/2 aho Manchester City izahura na Real Madrid naho AC Milan izacakirana na Inter de Milan.
Sane na Mane bagaragaye basuhuzanya, igihe Mane yaramusimbuye, (photo;Instagram)
