Igikombe cy'Isi kirakinwa Ku nshuro ya 22, Twinjire mu kwezi kw'igikombe cy'Isi tureba ibintu 10 by'ingenzi bizakiranga.

Nov 1, 2022 - 14:16
 1
Igikombe cy'Isi kirakinwa Ku nshuro ya 22, Twinjire mu kwezi kw'igikombe cy'Isi tureba ibintu 10 by'ingenzi bizakiranga.

Harabura ibyumweru bitagera kuri bitatu, iminsi 19 igikombe cy'isi cya ruhago kigatangira kikabera muri Qatar, ni igikombe gitegerejwe n'abakunzi ba ruhago ku isi yose, Dore ko kiba rimwe mu myaka ine, igikombe cya 2022 nicyo gitahiwe!

Dore byinshi ukeneye kumenya kuri iki gikombe cy'isi cya ruhago cya 2022 mbere yuko gitangira!

1. Igikombe cy'Isi kizatangirwa n'umukino wambere wo gufungura irushanwa taliki 20 ugushyingo 2022 ku kibuga cya Al Bayt Stadium muri Qatar yakiriye iki gikombe itana mu mitwe na Ecuador zo mu itsinda A.

2. Igikombe cy'Isi cya 2022 kizaba ari igikombe cy'isi cya 22 gikinwe, kikanaba igikombe cy'isi cya mbere gikiniwe mu gihugu cy'abarabu (Arab world) ndetse cy'abayisilamu.

3. Igikombe cy'Isi cya 2022 kizamara Iminsi 28 ibikigira igikombe cy'Isi gikinwe iminsi mike kuva 1978, Dore ko kizatangira taliki 21 ugushyingo kugeza 18 ukuboza.

4. mu Rwanda DSTV niyo yonyine ifite uburenganzira bwo kuzerekana imikino y'igikombe cy'isi cya 2022 yose uko ari 64.

5. Inzoga ntizemewe muri Qatar

Kunywera inzoga mu uruhame cyangwa gusindira mu ruhame ntibyemewe n'amategeko ya Qatar. Ubikoze ahanishwa igifungo cy'amezi 6 cyangwa agacibwa amafaranga arenga ibihumbi 850 Rwf. Ku bibuga by'imikino ntanzoga zizahatangwa, gusa hashyizweho ahantu habugenewe ahazwi nka Fan zone niho honyine abafana banyoye agatama bazaba bemerewe kujya.

6. Igikombe cy'Isi gihenze kurusha ibindi byose byabayeho.

Igikombe cy'Isi cya 2022 cyo muri Qatar nicyo gikombe gitwaye akayabo k'amafaranga menshi gitegurwa  kuko kugeza ubu hatangazwa miliyari 200 z'amadorari y'amerika mu kubaka ibikorwaremezo nka Hoteri, ibibuga, imihanda n'ibindi. Ibikigira igikombe cy'isi gihenze mu mateka.

7. Igikombe cy'Isi cya kabiri kibereye muri Asia.

Qatar siyo yambere igiye kwakira igikombe cy'Isi muri Asia, igikombe cyambere kuri uyu mugabane wa Asia cyakiriwe n'ibihugu bibiri bya Koreya y'amajyepfo na Japan mu 2002.

Umwihariko iki gikombe cy'Isi gifite ni ukuba icya mbere kibereye mu burasirazuba bwo hagati.

8. Igikombe cy'Isi kizakinirwa ku bibuga bike cyane

Kimwe mu bintu bitangaje ku gikombe cy'Isi cya 2022 nuko kizabera ku bibuga bicye cyane, ibibuga 8 byonyine nibyo bizakinirwaho imikino y'igikombe cy'Isi cya ruhago, ikindi gikombe cyabereye ku bibuga bike mu mateka ni igikombe cyo mu 1978 cyakiriwe na Argentina kibera ku bibuga 6 gusa. ikindi gitangaje ni uko muri stade 8 zizakira igikombe cy'Isi cya 2022 ikibuga kimwe nicyo cyavuguruwe ibindi 7 byose ni bishya, byubakiwe gukinirwaho igikombe cy'isi cya 2022.

9. Igihugu cya mbere cyakiriye irushanwa ry'igikombe cy'isi kitarigeza kiryitabira na rimwe.

Qatar yagize ishyirahamwe rya ruhago mu 1960 iba umunyamuryango wa Fifa mu 1963. Kuva ubwo, Qatar igerageza kwitabira imikino y'igikombe cy'isi biyinanira. Uyu mwaka Qatar izitabira igikombe cy'Isi cya 2022 kuko ariyo yacyakiriye.

10. Igikombe cya mbere cy'isi kibaye umwamikazi Elizabeth wa kabiri atariho!

Umwamikazi Elizabeth wa kabiri yavutse mu 1926 Igikombe cy'Isi cyaruhago gitangira mu 1930. Umwamikazi wakunze kugaragara mu mikino y'igikombe cy'Isi mu bihe bitandukanye, igikombe cy'isi cya 2022 nicyo cyambere kigiye gukinwa atari ku Isi.

Dusoza bimwe mu bintu bidasanzwe  by'igikombe cy'isi cya ruhago cya 2022 kizabera muri Qatar, iki kibaye igihugu cyambere gito cyakiriye igikombe cy'isi, igihugu kingana na 11,000 Km² kikanaba aricyo gituwe n'abantu bacye cyakiriye iri rushanwa, gifite abaturage miliyoni 2.6 gisimbuye kuri uyu mwanya Uruguay yacyakiriye mu 1930 ifite abaturage miliyoni 3.5.

u Rwanda rungana na 26,338 km² ndetse rukanagira abaturage barenga miliyoni 11, rugire icyizere? tubitege amaso.