Indege y'ikipe ya Arsenal yatangiye gushya yitegura guhagurukana abakinnyi
Inkuru yasakaye ku Isi ko indege y'ikipe ya Arsenal yahuye n'ibibazo mu imbere muri yo bibyara umuriro. Ibyo byabaye yitegura guhagurukana abakinnyi bava mu Budage basubira i Londres mu Bwongereza.
Ku mugoroba wo ku Cyumweru, 23 Mata 2023 nibwo ikipe yose y'abagore ya Arsenal yari yamaze kwinjira mu ndege ya Boeing 737 ngo ibavane ku kibuga cy'indege cya Braunschweig Wolfsburg mu Budage ibasubize mu Bwongereza nyuma y'umukino bari bamaze kunganyamo 2-2 n'ikipe ya VFL Wolfsburg mu mikino y'amakipe yabaye aya mbere iwayo ku mugabane w' i Burayi mu bagore (Women UEFA Champions League), iyo ndege yahise ifatwa n'inkongi bakurwamo igitaraganya.
Nkuko inkuru y'igitangazamakuru "Sky" ibigaraza, abakinnyi bose b'ikipe y'abagore ya Arsenal bari bamaze kwicara mu ndege bitegura gusubizwa i Londres ariko muri benzine y'indege havutsemo ikibazo.
Abari bagiye kuyitwara (pilots) babonye munsi ya rimwe mu mababa yayo hari gucumbekamo umwotsi ukurikirwa n'umuriro, bahita babwirwa ko indege igiye kugurumana, bategeka abo bakinnyi kuvamo bwangu.
Na bo babumviye bavamo bihuse. Byahishuwe ko ntawakomeretse cyangwa ngo aburiremo ubuzima.
Abo bakinnyi bose ba Arsenal bahise bajyanwa gucumbikirwa muri hotel iri hafi y'icyo kibuga cy'indege cya Braunschweing Wolfsburg mu Budage.
Batumirijweho indi ndege yo kubacyura i Londres mu Bwongereza ku Mbere, 24 Mata 2023.
Ibitangazamakuru birimo Sky Sport ni byo byemeje iyo nkuru.
Abakinnyi b'ikipe ya Arsenal y'abagore barokowe inkongi y'umuriro yarifashe indege barimo, (photo;Internet)
