Nta mbabazi musaba! X Dealer yahishuye ko The Ben yamuhemukiye

X Dealer ugikurikiranweho kwiba telephone ya The Ben yibiwe i Burundi, yavuze ko aho gusaba imbabazi The Ben ahubwo we yagakwiye kuzimusaba kuko ngo yaramubabaje kandi barahoze ari inshuti magara.

Jun 12, 2024 - 09:23
Jun 12, 2024 - 10:33
 0
Nta mbabazi musaba! X Dealer yahishuye ko The Ben yamuhemukiye

Ndagijimana Eric uzwi nka X Dealer mu myidagaduro yo mu Rwanda ukurikiranweho kwiba telephone ya The Ben igihe bari mu gihugu cy’U Burundi, yahamije ko atigeze yiba telephone y’uwo muhanzi. Yahishuye ko The Ben yamuhemukiye, akwiye kumusaba imbabazi ndetse agashyira no mu bikorwa ibyo yamubwiye byo gukuraho ikirego.

 X Dealer uherutse mu rubanza ku wa 03 Kamena mu rukiko rw’ibanze rwa Nyarugenge aho rwatangiye kuburanisha mu mizi urubanza rwe aregwamo n’Ubushinjacyaha kwiba telefone ya The Ben icyaha cyabereye i Bujumbura, Burundi, ku itariki 1 Ukwakira 2023 mu ijoro ryabereyemo igitaramo cyabereye ahitwa Eden Garden Resort, ku nkengero z’ikiyaga cya Tanganyika.

Mu kiganiro X Dealer yagiranye na MIE Empire avuga ko yatunguwe no kubona The Ben atarakuyemo icyo kirego kandi yaramwemereye ko angomba kugikuramo.

Yagize ati:“Tugihura The Ben yarambwiye ngo narakubabariye, ndamubwira nti: umbabarira se nagukoreye iki? Ahubwo wakabaye unsaba imbabazi ko wambabaje kandi nta kintu nagukoreye, njye sinigeze nkwiba.”

”The Ben twari twahuye ambwira ko azakuramo icyo kirego kinshinja kwiba telephone ye. Antungira agatoki ku bantu be ba hafi ye ngo mbegere bamfashe, ndabegera ariko mbona bakomeje kundyarya. Kugeza ubu ntaragikuramo. Hagati aho, narikanze kuba yaranshinje kwiba telefone ye kandi twarahoze turi inshuti. Byatumye menya ko imitima y’abantu bari muri iyi myidagaduro ari migari.”

Yahishuye ko akomeje guhombeshwa amafaranga n’urwo rubanza kuko uko agiye kuburana yishyura umunyamategeko we amafaranga ibihumbi 500.

Urubanza ruheruka rwo ku wa 03 Kamena rw’iyo telefone ihabwa agaciro ka miliyoni 5, X Dealer ashinjwa kwiba, umucamanza yavuze ko umwanzuro w’urukiko uzasomwa ku itariki 12 Kamena 2024 Saa tanu z’amanywa.

Niyonkuru Augustin He is a journalist. For more information, please contact him; +250781548774.