Jose Chameleone arashinjwa ihohotera

Umuhanzikazi witwa Sencere yamaze gutanga ikirego gishinja Jose Chameleone ihohotera yamukoreye mu bihe bitandukanye.

Jun 11, 2024 - 18:30
Jun 11, 2024 - 19:26
 0
Jose Chameleone arashinjwa ihohotera

Cynthia Nagawa uzwi mu muziki wa Uganda nka Sencere yamaze gushyikiriza ikirego ishami rya Polisi ya Uganda riherereye ahitwa Kira (Kira Road Police), ashinja umuhanzi Jose Chameleone kumuhohotera inshuro zigera kuri eshatu(3).

Aya makuru yahamijwe n’umuvugizi wa Polisi ya Kampala, Luke Owoyesigire. Yavuze ko bamaze kwakira ikirego cy’uwo mukobwa ushinja Jose Chameleone ihohotera kandi ngo iperereza rirakomeje. Yagize ati:” Sencere yatugejejeho ikirego kivuga ko ku Gatandatu, 08 Kamena 2024, Jose Chameleone yamukubise ndetse agerageza kumuniga igihe bari mu kabari ka Casablanca gahereye i Kololo.”

“Twahise tumwohereza kwa muganga ngo bamusuzume, yazanye impapuro zigaragaza ko yakubiswe. Hagati aho, dukomeje gukurikirana icyo kirego.” 

Uyu mukobwa Sencere yafashe umwanzuro wo kujya ku mbuga nkoranyambaga atangaza ibyamubayeho. 

Yagize ati:”Yego Chameleon yarankubise. Nasanze ibyo umugore we amuvugaho ko ahohotera abagore ari byo kuko ejo hashize (hari ku Gatandatu tariki ya 08 Kamena 2024) yarankubise; yankubise ingumi mu nda, ankomeretsa mu isura, ku maguru no ku maboko, murabona ko mfite n’ibikomere, kandi iyi ni inshuro ya gatatu ankubise. Dore ko no mu gihe cya guma mu rugo yampohohoteye mu bihe bindukanye.”

“Hari abavuga ngo ndashaka kumusebya ngo nice izina rye kandi ngo azohereza abantu baze banyice (…. ). Simbyitayeho kuko ndambiwe ihohotera rye (….) muzi ko mu gihe cya guma mu rugo yari agiye gutuma ndeka umuziki kubera ihungabana yanteye. Ibyo kandi yabinkoreye nta kibi nigeze mukorera; nkabona araje arampohohoteye ntacyo namugize. Ubu mfite ibimenyetso byerekana ko yampohohoteye.”

Yongeyeho ko yatanze ikirego kubera ko yarambiwe guceceka kandi ahora amuhohotera.

Ati:”Ibyo yakoze birahagije, ndambiwe guceceka. Jose Chameleon mubona agenda, afite ikibazo mu mutwe. Polisi mumufashe, mbona akeneye ubujyanama.”

“Mbabwije ukuri umunsi wo ku wa Gatandatu (08 Kamena 2024) wari mubi kuko yarambabaje numva ngiye gushiramo umwuka!”

Impapuro zo kwa muganga zigaragaza ko uyu mukobwa yakomerekejwe mu maso, ku kaboko, ku maguru no mu nda.

Sencere ni umwe mu bahanziakazi bo mu gihugu cya Uganda bakoranye n’abo mu muryango wa Mayanja ari na wo Jose Chameleone akomokamo. Yakoranye na Pallaso indirimbo yitwa “Tusula ku Mwezi.” Nyuma Sencere yegereye Jose Chameleone bakorana indirimbo yitwa “Murilo.” Ni indirimbo yagiye hanze ku wa 13 Gicurasi 2021.

Jose Chameleone arashinjwa ihohotera n'umuhanzikazi Sencere 

Niyonkuru Augustin He is a journalist. For more information, please contact him; +250781548774.