Ni ikibondo! Umwana w’umwaka yaciye agahigo ku Isi mu gusiga amarangi bya gihanzi

Ikigo cyandika uduhigo hirya no hino ku Isi “Guinness World Records” cyatangaje ko umwana wo mu gihugu cya Ghana witwa Ace-Liam Nana Sam Ankrah yegukanye agahigo ko kuba umuhanzi ukuri muto (ikibondo) uzi gusiga amarangi mu buryo bwa gihanzi (painting).

Jun 11, 2024 - 14:26
Jun 11, 2024 - 15:48
 0
Ni ikibondo! Umwana w’umwaka yaciye agahigo ku Isi mu gusiga amarangi bya gihanzi

Ace-Liam Nana Sam Ankrah ni umwana wo mu gihugu cya Ghana wacyejwe n’ikigo karundura ku Isi cyandika abaciye uduhigo mu kintu runaka (Guinness World Records), kivuga ko uwo mwana ari we ukiri muto uciye agahigo ko gushushanyisha amarangi mu buryo bwa gihanzi.

Uyu mwana ukiri ikibondo kuko yavutse ku wa 16 Nyakanga 2022. Guinness World Records yasuzumiye ibihangano bye ndetse ibihera umugisha i Accra muri Ghana ku wa 15 Ukuboza 2023. Icyo gihe, Ace-Liam yarafite umwaka umwe(1) ndetse n’iminsi 152.

Mu birori byo kwerekana ibyo bihangano bye, ibihangano ikenda (9) mu icumi (10) byanejeje Madamu wa Perezida w’Igihugu cya Ghana, Madamu Rebecca Akufo-Addo.

Ubu akaba yamaze gushyikirizwa igihembo ke cya Guinness World Records. Ni igihembo yasabiwe na mama we witwa Chantelle Kuukua Eghan, mama we ni we wakoze ubusabe bwacyo (application). Uyu mumama usanzwe na we ari umuhanzikazi yavuze ko umwana we yatangiye kugaragaza ubushake mu bijyanye no gushushanya igihe yarafite amezi 6.

Yagize ati:”Igihe amarangi yabaga amushiranye yarampamagaraga akamenyesha ko ayo yahisemo yashize nkamufasha kubona andi(…) Igihe yabaga arangije yaravugaga ati: mama ndarangije, nkareba nkasanga yasize amarangi mu buryo buryoheye amaso."

”Ikintu cyose yashushanyaga akoresheje amarangi cyigaragaza amarangamutima ye; amatsiko n’ibyishimo bye.”

Eghan yabwiye BBC ko yanejejwe cyane no kuba Guinness World Records yaremeye ibihangano by’umwana we. Yakomeje agira ati:” Natunguwe n’ubutumwa bwa Guiness World Records ko umwana wanjye yemejwe! Nahise mfunga email, ubundi nshimira Imana.”

"Nizeye ko aya mahirwe azafasha umwana wanjye kubona ubufasha bwo kujya kwihuguramo hanze ya Ghana, akazavamo umuhanga mu gushushanyisha amarangi.”

Ibihangano by’uyu mwana byamaze gushyirwa mu nzu ndangamuco mu bya siyansi na tekinoloji yo mu gihugu cya Ghana (Museum of Science and Technology in Ghana) iherereye mu murwa mukuru Accra.

Uyu mwana aterwa ingabo mu bitugu na mama we

Niyonkuru Augustin He is a journalist. For more information, please contact him; +250781548774.