Pep Guardiola ngo gutoza ntibyari inzozi ze, zari imurikamideli!
Umutoza wa Manchester City, Pep Guardiola nyuma yo gutsinda Arsenal bahanganye ku gikombe ibitego 4-1 ubu ari guhabwa amahirwe yo kwisubiza igikombe cya Shampiyona y'Abongereza y'uyu mwaka. Ngo yumvaga azaba umunyamideli karundura aho kuba umutoza!
Josep Guardiola Sala uzwi nka Pep Guardiola ufatwa nk'umutoza mwiza mu Bwongereza, ari gutigisa kandi amakipe bahanganye, nyuma yo guhangamura Arsenal akayitsinda 4-1 mu ijoro ryo ku wa 26 Mata, inzozi ze ntizari ukuba umukinnyi w'umupira cyangwa umutoza, inzozi ze zari ukuba umunyamideri ukomeye cyane kuko yanabikoze igihe kitari gito ibi byatumye amenyana n'umutambukanyi afite witwa Cristina Serra.
Uyu mugabo w'umunya- Esipanye nubwo yakoraga ibijyanye n'imideli yari asanzwe akina umupira mu ikipe ya FC Barcelona gusa ngo ntiyiyumvaga nk'umukinnyi ahubwo yiyumvaga nk'umunyamideri ukomeye, nyuma yaje gutera ishoti ibyo byari inzozi ze.
Kuri ubu ni umutoza umaze kubaka ibigwi n'amateka byo gutwara ibikombe muri shampiyona zitandukanye zo ku mugabane w' i Burayi. Yatoje amakipe nka FC Barcelona yahesheje igikombe cya shampiyona ndetse anayihesha n'icya champions league yongeye no kuyihesha igikombe cya Copa del Rey. Yaje gutoza n'ikipe ya Bayern Munich ariko kuyihesha champions league ntibyigeze bikunda.
Pep Guardiola ubu ni umutoza w'ikipe ya Manchester City yayinjiyemo 2016-2017 ndetse ari guhabwa amahirwe yo gutwara shampiyona y' Ubwongereza y'uyu mwaka wa 2022-2023, yaba ari inshuro ye ya 5, nyuma yo gutsinda Arsenal bahanganye ku gikombe ibitego 4-1 mu mukino wabaye ku wa 3 w'iki cyumweru kuri sitade ya Etihad.
Uwo mukino wasize Arsenal ari iya mbere n'amanota 75 naho Manchester City ikomeje kuyicanaho umuriro n'amanota 73. Kugira ngo Shampiyona y'Abongereza igere ku musozo, Arsenal isigaranye imikino 5, Manchester City isigaranye imikino 7.
