Polisi ya Uganda yahishuye impamvu yafunze Bobi Young
Nyuma yuko amakuru acicikanye ku mbuga nkoranyambaga avuga ko umwe mu bayoboke b'ishyaka rya Bobi Wine (NUP), Bobi Young yatawe muri yombi, Polisi ya Uganda yatangaje ko akurikiranweho kwambara impuzankano z'ingabo za Uganda.
Bobi Young ni umwe mu bayoboke b'imbere b'ishyaka ry'umuhanzi karundura muri Uganda, Bobi Wine rizwi nka NUP. Uyu mugabo yatawe muri yombi akurikiranweho kwambara no gutunga impuzankano z'ingabo za Uganda. Akaba yayambaragaho n'ipeti rya Jenerali (ufite inyenyeri enye).
Nyuma yuko mu ijoro rishyira ku wa 23 Gicurasi 2024 ku mbuga nkoranyambaga hakwirakwijwe ifoto ya Bobi Young yambaye impuzankano z'ingabo za Uganda zifite n'amapeti, abazikoresha bo muri Uganda bavuze ko uwo mugabo uri mu nshuti za Bobi Wine akaba no mu ishyaka rye rizwi nka NUP yatawe muri yombi, bamwe ntibasobanukirwe impamvu nyayo yatumye atabwa muri yombi.
Polisi ya Uganda yahishuye ko nyuma y'iperereza ryakozwe mu rugo rwa Twinomijuni Antony uzwi nka Bobi Young aho atuye i Mutungo, basanze atunze ibikoresho bya gisirikare kandi mu by'ukuri ari umuturage usanzwe (umusevire).
Bakomeje batangaza ko bamusanganye ibirimo impuzankano z'ingabo za Uganda, amapeti yo ku rwego rwa Jenerali w'inyenyeri enye w'ingabo za Uganda, n'inkweto za gisirikare zo kugendana mu butayu. Babaye bamutaye muri yombi mu gihe iperereza rigikomeje, akurikiranweho gutunga mu buryo butemewe n'amategeko ibikoresho by'ingabo za Uganda.
Polisi ya Uganda itangaje ibyo, hari abari babihuje n'ibyabaye mu gitondo cyo kuri uyu wa Gatatu tariki ya 22 Gicurasi 2024, aho Polisi ya Uganda yagose ahari hateraniye abarwanashyaka b’ishyaka ritavuga rumwe n’ubutegetsi bwa Uganda, NUP, rya Robert Kyagulanyi uzwi nka Bobi Wine, ita muri yombi abagera kuri 20 barimo n’abanyamakuru.
Muri 2018, 'mbu' yanditse ko Polisi ya Uganda yari yihanangirije abantu batunze ibikoresho bya gisirikare barimo n'ibyamamare kubisubiza. Ni nyuma yuko abarimo Ragga Dee, Jose Chameleon na Sheebah Karungi bagaragaraga mu ruhame bambaye impuzankano z'ingabo za Uganda.
Hari abakomeje guhonyora nkana iryo bwiriza, bavuga ko abigeze gutabwa muri yombi barimo Dj Michael nta gihano bahawe ahubwo bahise barekurwa.
Bobi Young akurikiranweho gutunga ibikoresho n' impuzankano z'ingabo za Uganda
