Rayon Sports yakuyeho urujijo ku igenda rya Youssef Rhab, Ayoub n' umutoza Masudi Djuma

Mu kiganiro kirambuye umuvugizi wa Rayon Sports yagiranye na RBA yemeje ko abakinnyi barimo Youssef Rhab na Ayoub bamaze gutandukana na Rayon Sports. Yahamije ko mu buryo bwumvikanyweho ikipe yabo yatandukanye n' umutoza mukuru wayitoje imikino ibanza ya shampiyona 2021/2022, Masudi Juma.

Uyu muvugizi wa Rayon Sports yasobanuye ko abo bakinnyi batandukanye na Rayon Sports kubera amasezerano yabo yarangiye atari ukubera ibihuha bivugwa ko basebeje Rayon Sports.

Yagize ati;" Murabizi ko dufitanye umubano mwiza n' ikipe yo muri Maroke(Morocco) yitwa Raja Casablanca, iyo kipe twemeranyijwe ko tuzajya duhererekanya abakinnyi. Aba bakinnyi rero baje muri ubwo buryo."

" Ni abakinnyi baje muri Rayon Sports bataramenyera ubuzima bwo hanze; ni bwo bari bakiva mu kademi. Mu minsi yashize bahoraga batwaka uruhushya rwo kujya gusura imiryango yabo. Bari bakumbuye imiryango yabo."

" Twari twagiranye amasezerano n' ikipe ya Raja Casablanca yo gukorana n' aba bakinnyi amezi yarangiye muri iyi Mutarama. Ntabwo twongeye amasezerano."

Yanyomoje ibivugwa ko Rayon Sports ariyo yabirukanye. Yagize ati;" Abantu batandukanye bari kuvuga ko Rayon Sports ari yo yabirukanye kubera amagambo ayisebya; Ibyo bihuha biravuga ko Rhab na Ayoub batangarije ibitangazamakuru byo muri Maroke ko muri Rayon Sports babayeho nk' imfungwa."

" Ibyo si byo, ni ukubera amasezerano  yabo yarangiye, ntitwabasha kongera andi."

Yongeyeho ko ubufatanye bafitanye n' iriya kipe bukomeye cyane ku buryo bashobora kuboherereza abandi bakinnyi.

Jean Paul Nkurunziza yasobanuye neza ko Rayon Sports yamaze gutandukana n' uwari umutoza mukuru wayo Masudi Djuma.

Yagize ati;" Ni umutoza warumaze igihe ahagaritswe kubera umusaruro mubi yagaragazaga. Nyuma y' ibiganiro bemeranyijwe ko batandukanye. Ubu ikipe irimo gutozwa na Romami Marcel nk' umutoza wagateganyo. Umutoza mukuru aracyashakishwa."

Yatangaje ko abakunzi ba Rayon Sports batagomba kugira impungenge kubijyanye n' abakinnyi. Abakinnyi batandukanye ngo barahari kandi biteguye guhatana, intego ni ugutwara igikombe cya shampiyona y' u Rwanda 2021/2022.