Afrika: Diamond ayoboye urutonde rw'abahanzi barebwe cyane kuri Youtube
Diamond Platinumz ukomoka mu gihugu cya Tanzania yagaragajwe nk'umuhanzi wa mbere muri Afrika warebwe kenshi ku rubuga rwa YouTube.
Umuhanzi karundura ukomoka mu gihugu cya Tanzania, Naseeb Abdul Juma uzwi nka Diamond Platinumz yasohotse ku rutonde ari uwa mbere rw'abahanzi bo muri Afrika barebwe inshuro nyinshi ku rubuga rwa YouTube, akaba yararebwe inshuro zirenga miliyali 2.14, yahigitse abarimo Burna Boy, Wizkid na Davido.
Uyu Diamond Platinumz w'imyaka 33, akomeje kugaragaza ko ari igihangange mu muziki w'Afrika nk'uko imibare n'ibimenyetso bibigaragaza. Yarebwe inshuro zirenga miliyali 2.14, ni mu gihe uwamukurikiye ari Umunya-Nigeria, Burna Boy warebwe n'abarenga miliyali 2.05.
Ababaherekeje ni Wizkid warebwe n'abarenga miliyali 1.67, Umuhanzi ukomoka muri RDCongo, Fally Ipupa yarebwe n'abarenga miliyali 1.40.
Umuhanzi ufunga urutonde rw'abahanzi 5 barebwe inshuro nyinshi ku rubuga rwa YouTube ni Davido warebwe n'abarenga miliyali 1.29, ni mu gihe amaze iminsi ashyize hanze umuzingo w'indirimbo "Timeless" ukomeje gutigisa imbuga zicuruza umuziki.
