Al Pacino n'umukunzi we baritegura kwibaruka
Umunyabigwi mu gukina filime uba muri Leta Zunze Ubumwe z'Amerika, Al Pacino w'imyaka 83 byahishuye ko uwo bacuditse amutwitiye umwana we wa kane.
Kuri uyu wa 31 Gicurasi 2023 inkuru yabaye kimomo ko umukinnyi karundura wa filime, wakinnye mu zirimo The Godfather, The Godfather Part II, The Godfather Part III, Heat, The Irishman na Hangman, azwi nka Al Pacino yitegura kwakira undi mwana we wa kane. Uwo mwana amutwitiwe n'umukunzi we witwa Noor Alfallah. Akaba umukobwa bacuditse muri iyi minsi.
Uyu Al Pacino wubatse izina rikomeye mu mwuga wo gukina filime akaba afite imyaka 83, asanzwe afite abana batatu. Ubu atwitiwe umwana wa kane n'uwitwa Noor Alfallah byahishuwe ko uwo mwana agejeje amezi umunani.
Noor Alfallah ni umukobwa w'imyaka 29. Ibyo byatangaje abatari bake bakoresha imbuga nkoranyambaga, bibaza ukuntu yafashe umwanzuro wo kuryamana n'umusaza w'imyaka 83. Abandi bati;" imyaka ni imibare."
