Alejandro Garnacho yasinyiye Manchester United
Garnacho ukinira Manchester United yongereye amasezerano y'imyaka itanu muri iyi kipe, ni nyuma yuko umutoza we Erik Ten Hag yamwangiye gukinira Argentina mu gikombe cy'Isi cyabatarengeje imyaka 20.
Garnacho wagiye muri Manchester United avuye muri Atletico Madrid kuri ubu yongereye amasezerano y'imyaka itanu mu ikipe akinamo yo mu mujyi wa Manchester mu gihugu cy' Ubwongereza, ari yo Manchester United. Ni nyuma yuko yigaragaje cyane muri shampiyona aho yatsinze ibitego 5 anafasha bagenzi be gutsinda (atanga assists) 6 mu mikino 31 yakinnye mbere yo kugira imvune.
Umuyobozi w'umupira w' amaguru wa Man United, John Murtough yagize icyo avuga kuri uyu mukinnyi, ati" Garnacho yaritanze rwose kugira ngo agere ku ntego iyi kipe yari yamugeneye kuva yagera i Manchester. Kumwongerera amasezerano mashya y'imyaka itanu agaragaza ko twizeye ko azakomeza iterambere rye rishimishije".
Uyu musore yasinye aya masezerano nyuma yo kwangirwa n'umutoza Erik Ten Hag gukinira Argentina mu gikombe cy'isi cy'abatarengeje imyaka 20 kuko kugenda kwe byari gutuma adakina umukino w'igikombe cya FA Cup aho Manchester United izakira Manchester city.
Argentina yari yifuje cyane gushyira Garnacho mu ikipe yabo mu irushanwa ry'igikombe cy'isi cy'abatarengeje imyaka 20 kuko uruhare rwe rwatanga amahirwe menshi yo gutsinda.
