Drake yamenye akayabo

Kuri uyu wa Kane, 9 Gashyantare 2023, nibwo Umuraperi rurangiranwa Drake yaciye ku rukuta rwe rwa Instagram asangiza abakoresha urwo rubuga ko mu birori bya Super Bowl LVII 2023 ku mukino wa kamparampaka w' irushanwa rya ruhago rya Leta Zunze Ubumwe z'Amerika (NFL) uzahuza  Kansas City Chiefs na Philadelphia Eagles, azaba ari inyuma ya Kansas City Chiefs ndetse akaba yamaze kuyitegera ($965,000), asaga gato miliyali y' Amanyarwanda.

Ni ibirori bya Super Bowl LVII 2023 bizaba ku Cyumweru, 12 Gashyantare 2023, bizaba bishingiye ku mukino wa nyuma wa kamparampaka uzahuza Kansas City Chiefs na Philadelphia Eagles. Umuraperi Drake utajya usiba kwishora mu gutegera amakipe aba ahanganye mu mikino runaka, yatangaje ko azaba ashyigikiye Chiefs, yongeraho ko yamaze gutera imigwi amafaranga yamaze kuyitegera asaga miliyali y'Amanyarwanda.

 Muri ayo mafaranga, Drake yafashemo make ayategera bamwe mu bakinnyi ba Chiefs ko bazatsinda, urugero ni nka Patrick Mahomes na Juju Smith- Schuster.

Igitangazamakuru TMZ cyatangaje ko Drake aherutse kuyora akayabo kuri Chiefs, aho yateze miliyoni 1 y'Amadolari y'Abanyamerika ($ 1) ko iza gutsinda Cincinnati Bengals, byarangiye iyitsinze, Drake ahita ayora agera kuri $2.

Abatari bake kuri Instagram babwiye Drake ko yihombeje, Chiefs itazigera itsinda Philadelphia, bahamya ko ikomeye cyane kurusha Chiefs.

Ibyo birori bya Super Bowl LVII 2023 bizaba ku wa 12 Gashyantare 2023, bizabera muri sitade ya State Farm Stadium ho muri Arizona, Leta Zunze Ubumwe z'Amerika.

Rihanna azaririmbira abazaba bacyitabiriye ndetse n'abazaba bari kugikurikirana kuri televiziyo no ku mbuga nkoranyambaga zitandukanye, igihe igice cya mbere cy'umukino cyizaba cyirangiye. Imyiteguro irarimbanyije.