Kuki Erling Haaland yahize abarimo Saka na Kevin De Bruyne?
Umukinnyi ukinira ikipe ya Manchester city Erling Haaland yahawe igihembo cy'umukinnyi mwiza w'umwaka wa 2022/23 muri shampiyona y'icyiciro cya mbere mu Bwongereza, gitangwa n'ishyirahamwe ry'abanditsi mu mupira w'amaguru.
Uyu mukinnyi Erling Braut Haaland akomoka mu gihugu cya Noruveje (Norway) yabonye amajwi 82 ku ijana ya FWA mu gihe Bukayo Saka ari we wamukurikiye ku mwanya wa kabiri ndetse na Martin Odegaard ku mwanya wa gatatu bombi bakinira Arsenal, ku mwanya wa kane haje Kevin De Bruyne mu gihe umukinnyi wa Manchester united Marcus Rashford yaje ku mwanya wa 5.
Haaland atsindiye iki gihembo nyuma ya Rahim Sterling wagitwaye muri 2019 ndetse na Ruben Diaz wagitwaye 2021.
Haaland yatsinze ibitego 51bidasanzwe. Ibitego by'uyu musore w'imyaka 22 byaje kugaragara mu mikino 47 gusa detse ku mukino Man City yakinnye na West Ham mu ntangiriro z'uku kwezi byatumye agera ku bitego 35 muri Shampiyona y'Abongereza.
Uyu musore waje muri Man City avuye mu ikipe ya Borussia Dortmund mu Budage, akomeje guca uduhigo nyuma yo gukuraho agahigo ka Mohamed Salah mu kugira ibitego nyinshi muri Shampiyona y'Abongereza, akaba yahawe igihembo cy'umukinnyi mwiza w'umwaka wa 2022/23, yemezwa kandi ko ari we mukinnyi w'ukwezi kwa 4.
