Minisitiri w' intebe wa Australia, Morrison yategetse Kanye West kwikingiza Covid19

Minisitiri w'intebe wa Australia, bwana Morrison, kuri uyu wa Gatandatu, 29 Mutarama 2022, yagiranye ikiganiro n' abanyamakuru. Yatangaje ko Kanye West atazemererwa gukora ibitaramo muri Australia, igihe atikingije byuzuye icyorezo cya corona virusi(Covid19).

Mu kwezi kwa Wererwe 2022 muri Australia, hateganyijwe ibitaramo bitandukanye  bizakorwa n' ikirangirire mu njyana ya hip hop, ukorera umuziki we muri Leta Zunze Ubumwe z'Amerika, 'Kanye West (Ye).'

Mu kiganiro n' abanyamakuru, minisitiri w'intebe wa Australia, Morrison yemeje ko niba Kanye West akomeje kwinangira gufata inkingo zombi za Covid19, atazemererwa gukandagiza ikirenge cye ku butaka bwa Australia.

Bwana  Morrison yatangaje ko Kanye West ataruta abandi bantu bose bagiye bangirwa kugira icyo bakora muri Australia. Yatanze urugero rw' ikirangirire mu mukino wa Tennis, Novak Djokovic, wangiwe gukina "Australian Open"

Novak Djokovic yari mu bakinnyi bakomeye bari bitezwe muri "Australian Open," ariko yanze kuva ku izima, yanga kwikingiza inkingi za corona virusi(Covid19), byamuviriyemo kwirukanwa. Novak yafatiwe ibyemezo bikakaye; yasubijwe iwabo adakinnye" Australian Open."

Ku munsi wo ku wa Gatanu, 28 Mutarama 2022, abantu batandukanye muri Australia, bari bamenyesheje abakunzi b'ibitaramo ko Kanye West azabataramira mu kwezi kwa Werurwe2022.

Mu mwaka ushize wa 2021, Kanye West yatangarije ibitangazamakuru byo muri Leta Zunze Ubumwe z'Amerika ko yamaze gufata urukingo rumwe rwa Covid19. 

Kanye West ntacyo arabasha gutangaza kuri ibyo minisitiri wa Australia, bwana Morrison yamutegetse.