Miss Burundi 2023: Ikamba ryabonye nyiraryo
Irushanwa ryo gushaka Nyampinga w'u Burundi (Miss Burundi 2023) ryaraye rishyizweho akadomo. Ikamba ryatsindiwe na Miss Ndayizeye.
Nyuma y'iminsi itari mike irushanwa ryo gushaka Nyampinga w'u Burundi riyobora inkuru zagarukaga ku myidagaduro muri icyo gihugu, ryaraye rishyizweho akadomo. Ni irushanwa ryasojwe mu ijoro ryo ku wa Gatandatu rishyira iryo ku Cyumweru, 25 Kamena 2023. Ryasize ikamba ryegukanwe n'umukobwa waruhagarariye agace ka Bubanza, witwa Ndayizeye Carelle Lellie.
Ni umukobwa wahigitse bagenzi be 11 bageranye ku munsi wa nyuma, abasha kuba Nyampinga w'u Burundi 2023 (Miss Burundi 2023).
Ibyo birori byo gutora Nyampinga w'u Burundi byari byitabiriwe na Madamu w'Umukuru w'Igihugu cy' u Burundi, Angeline Ndayishimiye Ndayubaha, wagaragazaga akanyamuneza atewe n'imitegurire y'iryo rushanwa ndetse n'uburyo abo bakobwa bari kwitwara.
Miss Lellie akimara kwegukana iri kamba yashimiwe n'abari baryitabiriwe, ahabwa n'indabo nk'umukobwa ugeze ku gikorwa kidasanzwe, nyuma aza gusuhuzwa na Miss Burundi w'umwaka ushize wa 2022, Miss Kelly Ngaruko.
Mu byo yahembwe harimo n'imodoka iri mu bwoko bwa Toyota, akazafashwa no kuyibonera ibituma ikora neza.
Iri rushanwa ryari rimaze amezi atari munsi y'abiri. Ku ikubitiro hiyandikishije abakobwa 142, baza kugenda bagabanya, hatorwamo abajyanye n'ibyo bagenderagaho hasigaramo 11. Aba ni bo bageze ku munsi wa nyuma bagihatana, none ryegukanwe na Miss Lellie Carelle.
Miss Carelle watowe nka Nyampinga w'u Burundi 2023,( photos;Internet)
Ni ibiroro byitabiriwe na Madamu w'Umukuru w'Igihugu cy'u Burundi, Angeline Ndayishimiye, (photos;Instagram)
