Rurageretse hagati ya DJ Fernando n'uvuga ko yamwandikiye 'Bellissima'
Umuhanzi DJ Fernando wo mu gihugu cy'U Burundi wamenyekanye mu ndirimbo 'Bellissima' yihenuye ku mwanditsi w'indirimbo uzwi nka Kadie Kay uvuga ko ari we wamwandikiye 'Bellissima' yatumye amenyekana.
Umwe mu bahanzi bagezweho bo mu gihugu cy'U Burundi, DJ Fernando yasuzuguriye ku rubyiniro Kadie Kay uherutse gutangariza Buja Fm ko ari we wanditse indirimbo 'Mon Logo' na 'Bellissima' yatumye DJ Fernando amenyekana. Kay amusaba kumwubaha kuko n'izina 'Bellissima' ari irye.
Kadie Kay umaze kumenyekana mu muziki w'U Burundi biciye mu kwandikira abahanzi indirimbo ndetse no kuzishoramo dore ko ari we nyiri indirimbo 'Mon Logo' yaririmbwe n'itsinda 'We Love Muzika.' Kay yahamirije Buja Fm ko ari we wanditse indirimbo 'Bellissima' yaririmbwe na DJ Fernando.
Yagize ati:"DJ Fernando namumenyeye mu itsinda 'We Love Muzika.' Mu gihe yari agiye mu muhango wo gusaba no gukwa umukunzi we, namwandikiye indirimbo. Ndavuga nti: reka nyite 'Bellissima' kuko ni izina nkunda, ni ryo nitwa n'umugabo wanjye. Yaririmbye muri uwo muhango nyuma aza kuyishyira hanze irakundwa."
Igihe DJ Fernando yari ku rubyiniro mu birori bya 'Ka Summer Song' bitegurwa na Kazoza Fm byabaye mu ijoro ryo ku wa 14 Kamena 2024, yatangaje amagambo agaragaza ukwishongora kuri uwo mugore Kadie Kay wivuze ibigwi ko yamushyize ku itara.
Yagize ati:"Umwe uhora avuga ko yanyandikiye indirimbo naze aziririmbe."
Ni amagambo yababaje cyane Kadie Kay n'abo bari kumwe bitabiriye ibyo birori. Ati:"Niba atari njye wazanditse nibura nanyubahire ko twajyanye muri studio kuko nta mafaranga mwaka."
Uyu mugore Kadie Kay avuga ko atari ubwa mbere ababajwe na DJ Fernando kuko ngo mu ifatwa ry'amashusho y'indirimbo ye 'Mon Logo' yakoranye n'itsinda 'We Love Muzika' DJ Fernando abarizwamo, habonetse mugenzi we Gusto Melanin Boy, undi amuhamagaye asanga yagiye mu gitaramo i Goma muri RD Congo aho yavuye aza gutaramira i Kigali.
