Wa mukobwa w'imyaka 20 wari waraburiwe irengero, polisi yasanze yapfuye

Mu bwongereza , umukobwa wari waraburiwe irengero mu byumweru bibiri bishize , hagaragaye umurambo mu bihuru hafi n'agace kahariwe inganda maze polisi ifata umugabo w'imyaka 52 bikekwa ko ari we wabigizemo uruhare ngo apfe.

Jul 7, 2022 - 20:20
Jul 12, 2022 - 13:01
 0
Wa mukobwa w'imyaka 20 wari waraburiwe irengero, polisi yasanze yapfuye

Uyu mukobwa witwa  Somaiya Begum yabanaga na Nyirakuru hamwe na Nyirarume. Bivugwa ko baherukaga kumubona mu rugo kuwa Gatandatu taliki 26 Kamena ahagana mu gicamunsi nka saa munani z'amanywa. Ku munsi ukurikiyeho ni wo yatangajwe ko yaburiwe irengero maze hatangizwa iperereza rigamije kumushakisha.


Polisi yo muri West Yorkshire yataye muri yombi abagabo 3 n'umugore 1 bakekwagaho kugira aho bahurira n'ibura ry'uyu mu kobwa, nyuma hafatwa undi mugabo w'imyaka 52 ukekwaho ubu bwicanyi, aho polisi yari imaze iminsi ikorera iperereza mu gace k'inganda ahantu haba ama kontineri.

Umurambo w'uyu mukobwa wasanzwe hafi y'umuhanda wa Fitzwilliam muri Bradford, nk’uko byatangajwe n'umuvugizi wa police ya West Yorkshire. Yagize ati " Abashinzwe iperereza bashakaga Begum babonye umurambo" akomeza agira ati "iperereza rikomeye ryarakozwe kuva uyu mukobwa yaburirwa irengero, ndetse turanashimira abantu bose barigizemo uruhare batanga amakuru yifashishijwe mu iperereza".

Yongeyeho ko ikirego cyageze mu bucamanza ariko bagikora iperereza, gusa umuryango w'umukobwa ukaba wamaze kumenyeshwa iby’uru rupfu. Polisi yasobanuye imiterere y'uyu mukobwa ko afite inkomoko ku mugabane wa Aziya. Afite imisatsi y'umukara ndetse umunsi aburirwa irengero yari yambaye ipantaro y'umukara, agapira k'umukara n'agatambaro ko mu ijosi k'umukara.


Uyu mukobwa yakundaga kuba mu gace ka Brandford, hafi na Kaminuza ya Leeds Beckett bikekwa ko ariho yari umunyeshuri. Umukuru w’iri perereza, Marc Bowes yasobanuye urugendo rwo kumushaka kuva ubwo yaburaga kugeza asanzwe yapfuye. Yagize ati " Twari duhangayikishijwe n’ibura rya Somaiya ryabaye mu buryo budasanzwe".
"Twaraye amarondo dukoresha imbwa n'amashusho ya CCTV, ndetse tuzenguruka urugo ku rundi tubaza niba ntawamenye amakuru ye". Yasabye abaturage ko uzabona amakuru yisumbuyeho ku ibura rya Somaiya yayageza kuri Polisi.
Iyi polisi yatangaje ko mu guta muri yombi aba bagabo bisobanuye kugenza icyaha kandi ko uhamwe na cyo abiryozwa n'amategeko arengera ubuzima bw'umuntu .