H. E. Paul Kagame yazamuye mu ntera abasirikare 4 barimo aba Jenerari 3 n'umukoroneri 1
Kuri iki cyumweru 10 Nyakanga 2022, Perezida Paul Kagame yazamuye mu ntera abajenerali batatu bava ku ipeti rya Brigadier General bashyirwa ku ipeti rya Major General naho umwe ava ku ipeti rya Colonel agirwa Brigadier General.
Itangazo ryasohotse ryerekana ko abahawe ipeti rya Major General ni Vincent Nyakarundi uyobora Urwego rw’Ubutasi bwa Gisirikare, Willy Rwagasana uyobora Umutwe w’Ingabo zirinda Umukuru w’Igihugu na Ruki Karusisi uyobora Umutwe w’Ingabo zidasanzwe (Special Force).
Umuvugizi w’Ingabo z’u Rwanda, Ronald Rwivanga, yakuwe ku ipeti rya Colonel ashyirwa ku rya Brigadier General, nk’uko itangazo rya RDF ribigaragaza.
Muri Nzeri 2019 ni bwo Brigadier General Vincent Nyakarundi yagizwe Umuyobozi w’Urwego rw’Ubutasi bwa Gisirikare. Ipeti rya Brigadier General yarihawe muri Mutarama 2018.
Icyo gihe ni bwo Willy Rwagasana uyobora Umutwe w’Ingabo zirinda Umukuru w’Igihugu (Republican Guard) yazamuwe mu ntera ahabwa ipeti rya Brigadier General, avuye ku rya Colonel.
Karusisi Ruki yahawe ipeti rya Brigadier General mu Ugushyingo 2019 ari nabwo yahabwaga kuyobora Umutwe w’Ingabo zidasanzwe, Special Operations Force.
Muri Kamena 2021 ni bwo Ronald Rwivanga yazamuwe ku ipeti rya Lt Colonel agirwa Colonel. Mu Ukuboza 2020 ni bwo yagizwe Umuvugizi w’Ingabo z’u Rwanda.
