Tanzania: Habuze gato ngo indi ndege ikorere impanuka i Bukoba

I Bukoba hari hagiye kubera indi mpanuka y'indege.

Nov 17, 2022 - 18:09
Nov 17, 2022 - 18:18
 0
Tanzania: Habuze gato ngo indi ndege ikorere impanuka i Bukoba


Ku mugoroba wo kuri uyu wa Kane, 17 Ugushyingo 2022, kompanyi ya Tanzania itwara abagenzi mu kirere (ATCL: Air Tanzania Company Limited), yatangaje ko indege yabo yari igiye kugwa ku kibuga cy'indege cya Bukoba giherereye mu ntara ya Kagera igasanga ikirere cyimeze nabi. Ngo habaye ubuhanga bw'abari batwaye iyo ndege. Bahise bayikatisha maze bayisubiza inyuma, indege bayirenza icyiyaga cya Victoria, bayigusha ku kibuga cy'indege cya Mwanza.


Umwe mu bayobozi b'ikigo cya Tanzania gishinzwe ingendo zo mu kirere ( TCAA: Tanzania Civil Aviation Authority ), Hamza Johari, yemereje aya makuru igitangazamakuru "Mwananchi" ko iyo ndege ya Tanzania Air yari igiye gukorera impanuka ku kibuga cy'indege cya Bukoba, kubera ikirere cyari kimeze nabi. Abari bayitwaye bahise bayerekeza i Mwanza.


Amashusho yakwirakwijwe ku mbuga nkoranyambaga, agaragaza iyo ndege ishaka kugwa ku kibuga cy'indege cya Bukoba ariko igahita yerekeza i Mwanza.


Ibi bibaye nyuma yaho mu mugitondo cyo ku wa 06 Ugushyingo 2022, indege ya Kompanyi ya Precision Air yakoze impanuka igihe yari igiye kugwa ku kibuga cy'indege cya Bukoba, yahise igwa mu kiyaga cya Victoria cyegereye icyo kibuga. Iyo mpanuka yahitanye abagera kuri 19, harokotse 24.

Niyonkuru Augustin He is a journalist. For more information, please contact him; +250781548774.