Uganda: Ebola imaze kwisasira abagera kuri 54 mu minsi 55
OMS/WHO yatangaje ko Ebola ikomeje kuyogoza Uganda.
Kuri uyu wa Mbere, 14 Ugushyingo 2022, Ishami ry'umuryango w' Abibumbye ryita ku Buzima ( WHO/OMS) ryatangaje ko icyorezo cya Ebola kimaze guca igikuba mu gihugu cya Uganda, aho hamenyekanye ko kisasiye abagera kuri 54 hirya no hino mu gihugu. Abo bishwe na cyo mu minsi 55 ishize.
Ku wa 20 Nzeri 2022, nibwo habonetse umuntu wa mbere wafashwe n'icyo cyorezo. Kuva icyo gihe cyatangiye gukwirakwira. WHO yatangaje ko kuva kuri iyo tariki cyahitanye abagera kuri 54.
Akarere ka Mubende ni ko gafite umubare munini wabahitanywe na cyo. Gafite 29 muri 54 bapfuye bakizira.
Icyi cyorezo gikomeje gufata indi ntera mu tundi turere turimo Kampala,Masaka, Kassanda, Kagadi, Bunyangabu, Kyegegwa na Wakiso. Ibyo byatumye guverinoma yongera guma mu rugo muri utwo turere, aho bahawe iminsi 21 y'iyo gahunda (guma mu rugo).
Madamu Rosemary Byabashaija ukuriye itsinda riri muri gahunda yo guhashya Ebola muri Mubende, yabwiye igitangazamakuru "Monitor" ko bafite icyizere ko Ebola izacyendera kubera ukuntu Leta n' abaturage barimo kwitwara mu guhangana na cyo.
Guverinoma ya Uganda ikomeje urugamba rwo guhangana na Ebola. Hari aho amashuri n'ahandi hahurira abantu benshi hafunzwe mu rwego rwo kugihashya.
