Yago yitabaje RIB kubera YouTube channel ye yaburiwe irengero
Umuhanzi ubifatanya n'akazi k'itangazamakuru, Yago yaciye ku mbuga nkoranyambaga ahishura ko umuyoboro we wa YouTube uzwi nka 'Yago TV Show' waburiwe irengero. Yahise yitabaza Urwego rw'Igihugu rw'Ubugenzacyaha (RIB).
Nyarwaya Innocent uzwi nka Yago Pon Dat mu muziki nyarwanda no mu kazi k'itangazamakuru yaciye ku mbuga nkoranyambaga avuga ko umuyoboro we wa YouTube uzwi nka 'Yago TV Show' yawubuze, ahita yitabaza Urwego rw'Igihugu rw'Ubugenzacyaha (RIB) ngo rumufashe kuwubona.
Yago umaze iminsi avugwa mu nkuru zo gushyamirana n'uwahoze ari umukunzi we Munezero Rosine uzwi nka Dabijou ku mbuga nkoranyambaga, yavuze ko umuntu utaramenyekana yamutwaye umuyoboro we wa YouTube.
Yagize ati:"Ku itariki ya 01 Nyakanga 2024 ahagana Saa Yine z'Amanywa (10:00 am) nibwo umuyoboro wa YouTube, Yago TV Show waburiwe irengero, ubura bikozwe n'umuntu utaramenyekana gusa twamaze kwitabaza Urwego rw'Igihugu rw'Ubugenzacyaha (RIB). Vuba muramenya ukuri."
Si ubwa mbere uyu muyoboro 'Yago TV Show' uburiwe irengero kuko mu bihe byatambutse nabwo wigeze kubura ku rubuga rwa YouTube ariko nyuma uza kugaruka.
Ni umwe mu miyoboro ya YouTube mu Rwanda ikunzwe kandi itambutsa ibiganiro bishingiye ku myidagaduro.
Kugeza ubwo twakoraga iyi nkuru ntabwo uyu muyoboro 'Yago TV Show' wari bwagaruke ku rubuga rwa YouTube.
Yago yitabaje RIB ngo imufashe kugarura umuyoboro we wa YouTube 'Yago TV Show'
