Covid19 ikomeje guhitana abatari bake itaretse n’ impinja, amakuru mashya

Covid19 ikomeje guhitana abatari bake itaretse n’ impinja, amakuru mashya

Ubwandu bushya bwa Covid19 bukomeje kuzamuka ari nako abahitanwa na yo bakomeje kwiyongera.

Hirya no hino ku Isi hakomeje kumvikana izamuka ry’ umubare w’ abandura icyorezo cya corona virusi. Kuva hakwaduka ubwoko bushya bwa corona virusi buzwi nka Omicron bwagaragaye bwa mbere muri Afrika y’ epfo mu kwezi k’ Ugushyingo 2021, umubare w’abandura wariyongereye. Bumaze kugera mu Rwanda byabaye ibindi bindi. Amakuru mashya yo kuri uyu wa 05 Mutarama 2022 agaragaza ko habonetse ubwandu bushya ku bantu bagera ku 1066, hitaba Imana abagore bane (4) n’ uruhinja.


Mu makuru mashya Minisiteri y’ Ubuzima yatangaje kuri uyu wa 05 Mutarama 2022, yihanganishije imiryango yabuze abayo bazize corona virusi.

Bagize bati;
“Twihanganishije imiryango y’ abagore bane (4) n’ uruhinja bitabye Imana bazize icyorezo cya Corona virusi.”


Iyi Minisiteri kandi yemeje ko abantu bagera ku 1066 aribo basanzwemo ubwandu bushya bwa Covid19. Umujyi wa Kigali urugarijwe bikomeye, dore ko abagera kuri 344 ariho bagaragaye. Mu Karere ka Ngororero habonetse abageri ku 181.


Ku wa 14 Ukuboza 2021 nibwo Minisiteri y’ ubuzima yatangaje ko ubwoko bushya bwa Covid19 buzwi nka Omicron bwamaze kugera mu Rwanda. Buzwiho gukwirakwira mu bantu benshi mu gihe gito. Kuva ubwo imibare y’ abandura corona virusi yatangiye gutumbagira. Hari nubwo habaruwe ubwandu bushya mu bantu barenga ibihumbi bibiri.


Hagati y’ ukwezi kwa Munani n’ ukwa Cumi na Kumwe, ubwandu bushya bwari bwagabanutse ku buryo bugaragara, bituma ibitaramo ndetse n’ utubari bikingurwa.


Uku kwiyongera k’ ubwandu bushya byatumye shapiyona y’ umupira w’ amaguru ndetse n’ ibitaramo byongera gusubikwa.