Harmonize yatangajwe n'abafana ba Burna Boy
Umuhanzi Harmonize wo mu gihugu cya Leta Zunze Ubumwe za Tanzania ntiyiyumvisha ukuntu Burna Boy aririmbira muri Sitade yuzuyemo abakunzi b'umuziki ibihumbi 80.
Umwe mu bahanzi bakomeye bo mu gihugu cya Tanzania, Harmonize yaciye ku rubuga rwa Instagram atangazwa n'ukuntu Burna Boy yahurije hamwe abakunzi b'umuziki ibihumbi 80 mu gihugu cy'U Bwongereza.
Burna Boy wo mu gihugu cya Nigeria wari wataramiye mu gihugu cy'U Bwongereza, ku wa Gatandatu tariki ya 29 Kamena 2024, muri sitade yaho izwi nka London Stadium, habarurwa ko yahurije hamwe abarenga ibihumbi 80, yatangaje Harmonize cyangwa se Konde Boy wo mu gihugu cya Tanzania.
Yagize ati: Ibi bishoboka bite? Ku bwa njye, nayobewe Burna Boy uwo ari we. Ubu ntakiri Burna Boy nzi!"
Harmonize yaboneyeho umwanya wo kumutera ingabo mu bitugu. Yakomeje agira ati:"Komereza aho utsinde."
Ibi Harmonize abitangaje mu gihe ari kwitegura ibitaramo bizabera mu gihugu cya Canada. Ni ibitaramo bizatangirira mu iserukiramuco ryo ku wa 01 Nzeri 2024, ryiswe "Afro Beatz Music Festival." Ku wa 07 Nzeri azakomereza ibitaramo bye i Ottawa naho ku wa 14 Nzeri 2024 azataramira i Edmonton.
Harmonize ni umwe mu bahanzi bake bo mu karere ka Afurika y'i Burasirazuba babashije gukorana indirimbo na Burna Boy. Mu myaka itanu itambutse Harmonize, Diamond Platnumz na Burna Boy bahuriye mu ndirimbo "Kainama."
Harmonize ari kwitegura ibitaramo azakorera muri Canada
