Imodoka ya "RITCO" yahiye irakongoka
Imwe mu modoka ya kompanyi itwara abantu n'ibintu "RITCO" yahiye irakongoka. Yafashwe n' inkongi y'umuriro igihe yaritwaye abagenzi iva i Kigali igana i Ngororero mu Ntara y'Uburengerazuba.
Ku mugoroba wo kuri uyu wa 29 Mata nibwo inkuru yasakaye hirya no hino mu gihugu ko imodoka ya kompanyi itwara abagenzi n' ibintu ya "RITCO" yafashwe n'inkongi y'umuriro igihe yarigeze mu karere ka Kamonyi mu ntara y' Amajyepfo ahazwi nko Mugaperi ku bw'amahirwe nta muntu wayiguyemo.
Umuvugizi wa Polisi mu Ntara y'Amajyepfo, CIP Emmanuel Habiyaremye yabwiye "Igihe" ko iyo nkongi y'umuriro nta muntu yahitanye.
Yagize ati;" Imodoka y'ikigo gitwara abagenzi n'ibintu "RITCO" yavaga i Kigali yerekeza mu nzira za Muhanga mu masaha ya saa Kumi n'ebyiri z'umugoroba yafashwe n'inkongi y'umuriro igihe yari igeze i Musambira. Ku bw'amahirwe nta muntu wayikomerekeyemo cyangwa ngo ayigwemo ndetse nta n'imizigo yabo yangiritse. Icyayiteye ntikiramenyekana."
Shoferi wari uyitwaye yavuze ko iyo nkongi ishobora kuba yatewe n'ipine yaturitse igahita ibyara umuriro ugakongeza ibindi bice byayo.
Abagenzi bari bayirimo babwiye itangazamakuru ko umwotsi mwinshi watangiye kuva mu ipine shoferi ahita ayihagarika asaba abagenzi bose kuvamo no gukuramo imizigi yabo vuba vuba.
