Guma mu rugo irakomanga ku muryango! Imibare y’iminsi ine yikurikiranya yerekana ko abandura Covid-19 biyongera ubutitsa
Ku ya 11 Kamena 2021 handuye abantu 202 hapfa babiri ku ya 12 handura 284 kur uyu munsi hapfuye babiri. Ku itariki 13 Kamena handuye abantu 227 naho ku ya 14 handuye 241 babiri irabahitana.
Minisiteri y’Ubuzima yatangaje ko abantu babiri bahitanywe na Covid-19 mu gihe abanduye bo ari 241.
Abahitanywe n’iki cyorezo ni umugore wo mu Karere ka Rubavu w’imyaka 57 n’umugabo w’i Kigali w’imyaka 73. Byatumye abamaze guhitanwa n’iki cyorezo kuva cyagera mu Rwanda bagera kuri 372.
Abakize kuri uyu wa Mbere ni 42 mu gihe abari mu bitaro barembye ari 11.
Mu bwandu bwabonetse kuri uyu wa Mbere, umubare munini ni uwo muri Kigali aho habonetse abantu 66 mu gihe i Musanze ari 48 naho Rutsiro ni 27 na Muhanga ifite 21.
Usibye abanduye n’abakize, abakingiwe bo ni 1.965. Abamaze gukingirwa mu gihugu hose bahawe urukingo rwa AstraZeneca ni 242.624, bose babonye doze ya Kabiri.