Cristiano Ronaldo aritegura gusura Singapore
Umukinnyi rurangiranwa mu mupira w'amaguru, Cristiano Ronaldo azasubira gusura Singapore muri Kamena uyu mwaka.
Uyu mugabo Cristiano Ronaldo uzwi nka CR7 akaba yarakiriye "Ballon d'or" inshuro eshanu yagiye muri Singapore mu myaka yashize kimwe mu byamujyanye harimo gushyigikira fondasiyo ya Olempike ya Singapore- Peter- Lim Bourse. Hari mu mwaka wa 2019, uyu munya- Portugal yasuye mu buryo butunguranye ishuri ryibanze rya Yumin.
Ku cyumweru taliki 14 Gicurasi 2023 Cristiano Ronaldo yaciye ku rubuga rwe rwa Instagram ahishura ko agiye kongera gusura Singapore.
Yagize ati;"Niba hashize imyaka mike nshimishijwe no gusura Singapore, kumarana ikindi gihe n'abana batangaje ni byiza. Dutegereje kuzongera kubonana namwe mwese mu kwezi gutaha."
Uyu muryango wo muri Singapore washinzwe na fondasiyo ya olempike mu mwaka wa 2010 watanzweho miliyoni 10 z'amadolari ya Amerika muri zo miliyoni 7.48 z'amadolari ya Amerika, zatanzwe na Peter-Lim ufite ikipe y'umupira w'amaguru yo muri Espagne, Valencia, akaba kandi n'inshuti na Ronaldo.
Umusanzu wa Lim miliyoni 7.48 z'Amadolari y'Amerika ni yo nkunga nini muri Singapore yatanzwe n'umuntu ku giti ke mu iterambere rya Singapore nkuko iyo fondasiyo yabitangaje.
Kuri ubu Ronaldo akinira ikipe ya Al-nassr yo muri Saudi Arabia nyuma yuko amasezerano yagiranye na Manchester United ahagaritswe mu Ugushyingo 2022.
