Perezida wa Brazil, Lula yiyinjiriye mu kibazo cy'irondaruhu ryakorewe Vinicius Junior
Mu mpera z'icyumweru gishize nibwo umukinnyi w'ikipe ya Real Madrid yakorewe irondaruhu ari mu kibuga ikipe ye iri guhangana n'iya Valencia. Perezida wa Brazil, Lula yavuze ko agiye gufatanya n'abandi bakurikirane icyo kibazo .
Ku Cyumweru, 21 Gicurasi igihe ikipe ya Real Madrid yari ihanganye n' iya Valencia muri Espanye (Spain), abafana ba Valencia bumvikanye baririmba indirimbo z'ivangura ruhu zerekeye ku mukinnyi wa Madrid, Vinicius Junior. Perezida wa Brazil, Lula, Vinicius akomokamo, yavuze ko hagiye gukurikiranwa icyo kibazo cy'irondaruhu ryakorewe umukinnyi wabo.
Vinicius waje gukina muri Espanye (Spain) yakorewe irondaruhu, abafana bamutukaga bitewe n'ukuntu asa (Umwirabura). Hafashwe amajwi y'indirimbo baririmbaga ijyanye n'irondaruhu kuri sitade ya Mestalla. Yabikorewe mu mukino ikipe ye ya Real Madrid yatakazagamo amanota atatu itsindwa 1-0. Byatumye kandi umukino uhagarikwa umwanya babanza bahosha ayo magambo y'irondaruhu.
Ni ibintu byababaje cyane Perezida w'igihugu cya Brazil Luiz Inacio Lula da Silva yihanganishije Vinicius wahuye n'icyo kibazo. Yahise kandi akora inama y'igitaraganya n'itangazamakuru mu gihugu cy'Ubuyapani aho yagiye mu nama y'ibihugu 7 bikize (G7) avuga ko agiye kwegera abo bari kurwanya ayo magambo y'irondaruhu.
Yagize ati;" Mfite ikizere ko Ishyirahamwe ry' umupira w'amaguru ku Isi FIFA, Shampiyona ya Espanye n'ibindi bigo bizafatanya mu kurwanya iri rondaruhu bityo ntirikomeze kugaragara."
Vinicius kandi yagaragaye avuga ko iryo rondaruhu risiga icyasha igihugu cya Espanye.
