Akari ku mutima wa Benzema nyuma yo kwerekeza muri Al Ittihad
Umukinnyi ukomoka mu Bufaransa, Karim Benzema yitwaje Ballon d'Or aheruka kwegukana, yerekanywe mu ikipe nshya aheruka gusinyira ya Al Ittihad yo muri Saudi Arabia, yakirwa n'abafana bagera mu bihumbi bitandatu.
Nyuma yo kuva muri Real Madrid akerekeza muri Saudi Arabia, Benzema yerekanywe nk'umukinnyi mushya wa Al- Ittihad imbere y'abafana bageze mu bihumbi bitandatu muri sitade ya King Abdullah Sport City.
Uyu mukinnyi kandi yavuze ko akayabo k'amafaranga azajya ahabwa atari yo mpamvu yatumye aza gukina mu Burasirazuba bwo Hagati ahubwo ko imwe mu mpamvu ari uko Saudi Arabia ari igihugu cy'Abayisiramu ibi bijyanye n'imyemerere ye.
Nyuma yo kwerekanywa imbere y'imbaga y'abafana nk'umukinnyi mushya wa Al_Ittihad Benzema yishimiye uburyo yahawe ikaze ndetse n'uburyo abafana bamwishimiye na we abamurikira Ballon d'Or aherutse kwegukana.
Mu myaka 14 yamaze muri Real Madrid yatwaye ibikombe 4 bya shampiyona ya Espagne, ibikombe 5 bya European Champions League (UCL) ndetse n'ibikombe 3 bya Copa del Rey. Benzema kandi yatsinze ibitego 354, atanga imipira 165 yavuyemo ibitego mu mikino 648 yakinnye muri Real Madrid.
Benzema kandi abaye umukinnyi wa kabiri w'icyamamare werekeje mu Burasirazuba bwo Hagati nyuma yuko Cristiano na we wakiniye Real Madrid yerekeje mu ikipe ya Al_Nassr.
