Umudipolomate mukuru w'Ubusuwisi yapfuye nyuma yo 'guhanuka mu nyubako ndende'
Umwe mu bakozi bakuru ba Ambasade y'Ubusuwisi i Tehran muri Iran yahanutse mu nzu ndende yari atuyemo yitura hasi arapfa, nk'uko ibinyamakuru byaho bibivuga.
Umuvugizi wa serivisi y'ubutabazi yabwiye ikinyamakuru Mehr ko uwo mugore w'imyaka 51 yari umunyamabanga wa mbere wa ambasade, gusa ntiyatangaje izina rye.
Polisi yo mu gace kitwa Kamraniyeh yatabaje abafasha abaganga kuwa kabiri mu gitondo ariko "yari amaze umwanya yapfuye", nk'uko uwo muvugizi abivuga.
Minisiteri y'ububanyi n'amahanga y'Ubusuwisi yemeje ko hari umukozi wayo wapfuye by'impanuka.
Umuvugizi wayo yagize ati: "Ibiro bishinzwe ububanyi n'amahanga n'umujyanama mukuru wabyo Ignazio Cassis bababajwe n'urwo rupfu rubabaje kandi bihanganishije umuryango we,"
Iyi minisiteri yongeyeho ko iri kuvugana n'umuryango w'uwapfuye hamwe n'abategetsi muri Iran.
Ntiyatanze amakuru arenzeho ku buryo byagenze ngo uyu muntu apfe, ivuga ko ari ukurinda amakuru n'impamvu z'ubuzima bwite.
Minisiteri y'ububanyi n'amahanga ya Iran nayo yatangaje ubutumwa bwo kwihanganisha abagize ibyago, nk'uko bivugwa n'ibiro ntaramakuru bya leta Irna.
Iyi minisiteri yongeyeho ko iby'uru rupfu biri mu iperereza rikorwa n'ababishinzwe kandi ibizarivamo bizatangarizwa rubanda vuba.
Irna ivuga ko amakuru ikesha umwe mu batabazi ari uko ibyo kwiyahura byo bitarimo.
Ubusuwisi nibwo buhagarariye inyungu za Amerika kuva Washington na Tehran umubano wabyo wakwangirika nyuma gato y'impinduramatwara ya kisilamu mu 1979.