Umuramyi Valens Baz yashyize hanze indirimbo nshya “ Icyuzuzo”

Yanditswe na: DUSHIMIMANA Elias

Bazabayo Valens wamenyekanye ku izina rya Valens Baz akoresha ku rubyiniro  yashyize hanze indirimbo yise Icyuzuzo ikubiyemo amagambo akurura amarangamutima y’abatari bake.

Iyi ndirimbo yagiye ahagaragara kuri uyu wa Gatanu tariki ya 29 Ukuboza 2022, irimo ubutumwa bwerekana ukuntu inshuti ufata nk’inkoramutima ziguhinduka ariko yesu we akagukomeza ahubwo akakubera icyuzuzo.

Mu byamuteye guhita ashyira hanze “ Icyuzuzo” ni uko uyu muhanzi usengera mu itorero rya ADPR Kinyinya abona hari abo bigora kwihanganira ubuzima abantu baba babayemo.

Asanga atarujuje inshingano ze ndetse no kutesa umuhigo yari afite muri iyi myaka ibiri itambutse harimo kutageza kure ubutumwa bw’Imana kuko we asanga yaradohotse.

Yagize ati “Uyu ni umuhigo mba ndi guhigura kubwo ibitangaza Imana yankoreye, narifite uburwayi bwananiranye irabunkiza, Yankijije byinshi harimo ibigeragezo by’umuryango ndetse n’ubukene”.

Ikimutera imbaraga zo gukora n’ibitangaza n’urukundo Imana yamugiriye ku buryo nta yindi nyiturano cyangwa ikiguzi yaha Imana usibye kuyiririmbira no kubwiriza abantu abinyujije mu bihangano bye.

Ati “Namenye ubwenge nsanga ndwaye uburwayi budapfa gukira ariko ubu ndi mutaraga nyuma yuko umuryango wari waramvuje ahantu hatandukanye byaranze nsenze Imana irankiza, nkimenya yuko Imana ikiza nahize umuhingo wo kuyikorera mu gihe nakize, mvuga ko Imana nzayikorera ubuzima bwanjye bwose”.

Iyi ndirimbo nshya “ Icyuzuzo” isanze izindi zari ziri hanze esheshatu harimo; Ngwino,Shimirwa, Umurage, Inzira1000 na Ntibeshya ziboneka ku mbuga nkoranyambaga zitandukanye nka; YouTube, Apple music,Amazon's, Facebook n’ahandi tutarondoye.

Valens Baz ufata Israel Mbonyi nk’ikitegererezo yavukiye mu ntara y’Amajyepfo akarere ka Huye mu murenge wa Simbi akagali ka Cyendajuru ku itariki ya 30 Ukwakira 1994.