Chelsea yemeye guhara miliyoni 105 z’amapawundi ku mukinnyi watwaye igikombe cy’isi

Nyuma y'uko Enzo Fernandez yitwaye neza agafasha Argentine  kwegukana igikombe cy'Isi byatumye ikipe ya Chelsea idasinzira kugeza igihe yemeye gutanga miliyoni 105 z’amapawundi zifuzwa n’ikipe ya Benfica asanzwe akinira.

Uyu musore w’umuhanga watowe nk’umukinnyi muto w’itwaye neza kurusha abandi bose mu gikombe cy’isi cyabereye muri Qatar,ari kwifuzwa n’amakipe menshi i burayi by’umwihariko ayo mu Bwongereza.

Chelsea isanzwe izwiho kurekura akayabo mu kugura abakinnyi,biravugwa ko yamaze gutanga icyifuzo cyayo cyo gusinyisha uyu musore ndetse nta gihindutse ishobora kwishyura miliyoni 105 z’amapawundi zisabwa kugira ngo Benfica imurekure.

Biravugwa ko Newcastle, Manchester United na Liverpool zose zashakaga uyu mukinnyi.

Enzo ukifuza gukinira Benefica, asanzwe afite amasezerano azamugeza muri 2027 mu ikipe ya Benfica ndetse ngo arashaka kuyifasha kwegukana Champions League uyu mwaka.

Benfica yagaragaje ko ikomeye ubwo yanganyaga inshuro 2 na PSG mu itsinda bari bahuriyemo ndetse ikanyagira Juventus.

Fernandez amaze gukinira Benfica imikino 24 aho yatsinze ibitego 3 anatanga imipira yavuyemo ibindi 5.