Manchester City yanditse amateka ku mugabane w'i Burayi
Ikipe ya Manchester City yo mu Bwongereza yegukanye igikombe cya Champions league 2023 ku nshuro ya mbere igitwara Inter Milan yo mu Butaliyani.
Kuri uyu wa Gatandatu Saa tatu z'ijoro (21h00') ikipe ya Manchester City yahuye n'ikipe ya Inter Milan ku mukino wa nyuma wa UEFA Champions League wabereye kuri sitade ya Ataturk Olympic ya Istanbul muri Turkia. Ni umukino wahesheje icyo gikombe ikipe ya Manchester City.
Abakinnyi 11 ba Manchester City babanje mu kibuga: Ederson; Akanji, Stones, Rúben Dias, Aké; Rodri; Bernardo Silva, De Bruyne, Gündogan, Grealish na Haaland.
Abakinnyi 11 ba Inter Milan babanje mu kibuga : Onana; Darmian, Acerbi, Bastoni; Dumfries, Barella, Brozovic, Çalhanoglu, Dimarco; Dzeko na Lautaro Martínez.
Muri uyu mukino wa nyuma wa Champions League 2023, byari bigoye ku makipe yombi, dore ko igice cya mbere cyarangiye aya makipe yananiwe kwikiranura. Ku munota wa 35' Phil Foden yasimbuye Kevin De Bruyne wagize ikibazo cy'imvune.
Mu gice cya kabiri ku munota wa 68' Rodri yabashije gufungura amazamu ku ruhande rwa Manchester City, yinjiza igitego cy'amateka. Biba 1-0.
Ikipe ya Inter yakomeje kwatsa igitutu kuri Manchester City ariko birangira ntacyo bitanze.
Cya gitego Man City yatsinze ni cyo cyabahesheje insinzi .
Iyi kipe yo mu Bwongereza yahise yegukana igikombe cyabo cya mbere cya Champions League. Ni amateka bafashijwemo n'umutoza Pep Guardiola n'abakinnyi babo bakomeye barimo umuzamu Ederson, n'abandi barimo Rodri, Grealish na Haaland.
Muri uyu mukino kandi hagaragayemo amakarita y'umuhondo ku makipe yombi. Ku munota wa 53' Barella yahawe ikarita ndetse mu minota y'inyongera 5+ ku munota wa 90+1 Erling Haaland n'umuzamu wa Inter Milan, Onana bahawe ikarita y'umuhondo kubera amakimbirane bagiranye.
