Umuyobozi wa Kiyovu Sports, Juvenal yahigiye gutwara igikombe APR FC
Nubwo Shampiyona y' u Rwanda 2022/23 ibura umukino umwe gusa ngo igere ku musozo, ikipe izayegukana ntiraboneka. Iziri imbere ni APR, Kiyovu na Rayon Sports. Kiyovu yahigiye kucyegukana.
Kuri uyu wa Gatatu, 24 Gicurasi 2023 umuyobozi w'ikipe ya Kiyovu Sports, Juvenal Mvukiyehe yaciye ku rukuta rwe rwa Instagram ahishura ko nubwo ikipe ye iherutse gutsindirwa i Nyagatare n'ikipe yaho ya Sunrise, ikiri mu mujyo wo gutwara igikombe cya Shampiyona y' u Rwanda 2022/23. Ibi abitanganje mu gihe ikipe ye inganya n'iya mbere, APR FC amanota 60 ikabarusha ibitego, zombi zisigaje umukino umwe gusa.
Umuyobozi w'ikipe ya Kiyovu Sports, Mvukiyehe Juvenal yaremye agatima abafana b'iyo kipe avuga ko umukino umwe usigaye bagomba kuwutsinda kandi ngo gutwara igikombe biracyashoboka.
Yagize ati;" Intambara imenya nyirayo ari uko irangiye. Turasaba abafana kuguma inyuma y'ikipe yabo, kuko hari ibitarakorwa i Muhanga."
"Turasaba abafana kwitabira umukino wo ku Cyumweru, kuko ikipe irabakeneye."
Kuri uwo mukino ikipe ya Kiyovu Sports izaba ikina n'ikipe ya Rutsiro. Ni mu gihe ikipe ya APR FC izikiranura n'ikipe ya Gorilla.
Urutonde rwa Shampiyona y' u Rwanda 2022/23 rugaragaza ko ikipe ya APR ari iya mbere n'amanota 60, ikurikirwa na Kiyovu na yo ifite 60 ikarushwa ibitego. Rayon Sport na yo iri hafi aho n'amanota 58. Bivuze ko ikipe ya APR ndetse na Kiyovu buri imwe itsinzwe, Rayon Sports igatsinda yahita igira 61, igahita yegukana Shampiyona y' u Rwanda 2022/23.
